Солтүстік Қазақстан облысының прокурорлары пайдаланылмай жатқан жерлерді мемлекет меншігіне қайтарды.
Ведомствоның баспасөз қызметінің мәліметінше, Ақжар, Тимирязев, Уәлиханов аудандарының жер пайдаланушылары ауыл шаруашылығы мақсатындағы 34 жер учаскесін ұзақ уақыт бойы мақсатты пайдаланбаған.
Қазіргі уақытта прокурорлар жалпы ауданы 8,3 мың га-дан астам, құны 95,7 млн теңге болатын 8 жер учаскесін қайтарды. Қалған жер учаскелері бойынша қайтару жұмыстары жалғасуда.
Белгілі болғандай, ағымдағы жылдың басынан бастап қадағалау органы жалпы ауданы 125 мың га-дан астам, мақсаты бойынша пайдаланылмаған 34 жер учаскесін анықтады.
Еске сала кетейік, бұған дейін хабарланғандай, 2024 жылы Қазақстанның атқарушы органдары мемлекет меншігіне 2 млн га-дан астам жерді қайтарған.
Маусым айында белгілі болғандай, Алматы облысының прокурорлары мемлекетке ауданы 12,5 мың га, құны 2,5 млрд теңге болатын пайдаланылмай жатқан жерлердің 155 учаскесін қайтарған.
Тамыз айында Ақтөбе облысында мемлекет меншігіне ауданы 30 мың га ауыл шаруашылығы мақсатындағы жер учаскелері қайтарылғаны хабарланды.
Кейінірек Қостанай облысында мемлекетке ауданы 15 га және бағалау құны 254 млн теңгеден астам жер учаскесі қайтарылды.
Ақпан айында Қарағанды облысы Нұра ауданының прокуратурасы мемлекетке ауданы 46 271 га, кадастрлық құны 258 млн теңгеден астам пайдаланылмай жатқан ауыл шаруашылығы учаскесін қайтарды.