Табиғат қорғау прокуратурасы мониторинг барысында Алматы аумағында 30 рұқсатсыз қоқыс үйіндісін анықтады.
Ведомствоның баспасөз қызметі «ҚР жергілікті мемлекеттік басқару және өзін-өзі басқару туралы» Заңға сәйкес абаттандыру жұмыстарын ұйымдастыру міндеті аудандық әкімдерге жүктелгенін еске салды.
Мәселен, қалдықтарды басқару бойынша экологиялық талаптарды бұзғаны үшін Медеу және Түрксіб аудандары әкімдерінің орынбасарлары, сондай-ақ Алатау ауданы әкімі аппаратының басшысы әкімшілік жауапкершілікке тартылды.
«Қабылданған шаралармен әкімдіктер анықталған қоқыс үйінділерін жою бойынша жұмыстар жүргізді. Қаладағы экологиялық тәртіптің сақталуын бақылау жалғасуда», - делінген хабарламада.
Еске салайық, бұған дейін Абай облысында 347 рұқсатсыз қоқыс үйіндісін жою туралы формальды есептер үшін Аягөз, Бородулиха, Жарма және Бесқарағай аудандары әкімдерінің орынбасарлары және Семей қаласының тұрғын үй-коммуналдық шаруашылық бөлімінің басшысы әкімшілік жауапкершілікке тартылды.
Ал елордада жағдай мүлдем басқаша болып отыр. Астананың Экология департаменті мен санитарлық-эпидемиологиялық бақылау басқармасы мемлекеттік бақылауға саботаж жасаудың шеберлік сабағын көрсетуде.
Мәселен, экологтар журналистерден бұзушылардың жеке басын алдын ала анықтауды талап етеді, ал санитарлық дәрігерлер компания директорының жоқтығына байланысты медициналық қалдықтарға тексеру жүргізе алмайды. Нәтижесінде елорданың бақылаушы органдары нақты тексерулерді формальды жауаптармен алмастырып, айқын бұзушылықтар үшін жауапкершілік бұлыңғыр болып қалуда.