Қаржы мониторингі агенттігі (ҚМА) «АлбаСтройДор» ЖШС директоры Сергей Кимге қатысты «АрселорМиттал Темиртау» АҚ мүлкін жымқыру фактісі бойынша тергеу жүргізуде.
Ведомствоның баспасөз қызметінің мәліметінше, 2015 жылы «АрселорМиттал Темиртау» АҚ мен «АлбаСтройДор» ЖШС домен шлагын қайта өңдеуге, қайта өңдеуден қалған қалдық өнімдерге билік ету құқығынсыз шарт жасасқан.
Алайда, Ким өндірістік нысандарға еркін кіру мүмкіндігін пайдаланып, зауыт аумағынан домен қоспасын және кесекті шойынды жымқыру схемасын ұйымдастырғаны хабарланады.
Жымқырылған мүлікті шығару үшін қылмыстық схемаға үлестес күзет кәсіпорны — «Күзет 2050» ЖШС тартылған, оның қызметкерлері автокөлік құралдарының бақылаусыз кіруін қамтамасыз еткен.
Компания директоры жымқырылған мүлікті өзі бақылайтын «ГлобалСпецТорг» ЖШС және «ОрталықОптЖабдықтау» ЖШС арқылы заңдастырған.
Оның әрекеттерінің нәтижесінде жалпы сомасы 1,8 млрд теңгеден астам 31 мың тоннадан артық өнім жымқырылған. Күдікті 2 ай мерзімге қамауға алынды. Сотқа дейінгі тергеу жалғасуда.