Ақтөбеде сыбайлас жемқорлыққа айыпталған үш мемлекеттік қызметшіге үкім шығарылды. Айыпталушылар арасында ветеринария басқармасы басшысының орынбасары Қазмұханбетов, қалалық санитариялық-эпидемиологиялық бақылау басқармасының басшысы Есімбаев және оның бағыныштысы, басқарма қызметкері Жанғабаев болды.
Telegram-арнасы «HALYQSTAN» мәліметінше, Қазмұханбетов санитариялық-эпидемиологиялық бақылау басқармасына жақын туысына тиесілі жеке балабақшадағы рұқсат етілген орындар санын көбейтуді сұрап жүгінген. Ол үшін оң санитариялық қорытынды алу қажет болған.
Сотта анықталғандай, ведомство басшысы Есімбаев өзінің бағыныштысы Жанғабаевқа балабақшаның сыйымдылығын 48-ден 75 орынға дейін ұлғайта отырып, тиісті қорытынды дайындауды тапсырған. Жанғабаев бірнеше рет орынға шығып, сыйымдылықты ұлғайту мүмкін еместігін айтқанына қарамастан, құжат дайындалған.
Кейінірек Қазмұханбетов делдал арқылы Есімбаевқа пара ретінде 300 мың теңге берген. Бұл сомадан Есімбаев 195 мың теңгені өзіне қалдырып, 90 мыңын Жанғабаевқа және 15 мыңын делдалға берген.
Сотта Қазмұханбетов кінәсін толық мойындаған. Есімбаев ішінара мойындаса, Жанғабаев қылмысқа қатысын жоққа шығарған. Соңында сот іске қатысты барлық адамды кінәлі деп тауып, Қазмұханбетовке 3 жыл бас бостандығынан айыру, ал Есімбаев пен Жанғабаевқа әрқайсысына 7 жылдан бас бостандығынан айыру жазасын тағайындаған.