Компания «Caspiy Operating» ЖШС Ақтауда қатты тұрмыстық қалдықтарды (ҚТҚ) шығару қызметін көрсететін компания қала тұрғындарына ашық хатпен жүгінді. Себеп – қоқыс шығару кестесіндегі жиілеп кеткен ақаулар. Компанияда түсіндіргендей, жүйе күйреуге жақын, оған себеп – қолданыстағы тарифтің нақты шығындарға сәйкес келмеуі, сондай-ақ халық пен кәсіпорындардың өте жоғары қарызы.
Lada.kz мәліметінше, «Caspiy Operating» ЖШС өкілдері ҚТҚ шығарудың қолданыстағы тарифі 2022 жылы бекітілгені және бағаның өсуіне қарамастан өзгермегенін хабарлады:
- отын бағасы литріне 219 теңгеден 310 теңгеге дейін қымбаттады;
- қосалқы бөлшектер мен техникаға қызмет көрсету бағасы 2 еседен астам өсті;
- кадрлардың кетуі жағдайында жүргізушілердің жалақысы 400 000 теңгеге дейін көтерілді, ал қолданыстағы тариф тек 250 000 теңгені көздейді.
Жағдайды ушықтыратын тағы бір фактор – тұтынушылардың жинақталған қарызы, ол қазірдің өзінде 700 млн теңгеге жақындап қалды.
«Бұл сома компанияның жұмысын тоқтатады. Бізде осы қарыздарды өндіріп алу үшін қасақана төлемейтіндерге әсер ететін нақты тетіктер жоқ», - деді компанияда.
Компания әсіресе, шарт жасасудан бас тартатын, бірақ контейнерлерді, әсіресе ірі көлемді қалдықтар мен картон үшін үнемі пайдаланатын кәсіпорындар проблемасын ерекше атап өтті.
Бұл қоқыс жинайтын көліктерге қосымша төленбеген жүктеме тудыратыны, ал адал тұрғындар іс жүзінде жауапсыз кәсіпкерлердің қалдықтарын шығару ақысын төлеп жатқаны атап өтілді.
«Біз – жеке компаниямыз. Бізде бюджеттік дотация жоқ. Біз тек тариф бойынша түсетін қаражат есебінен өмір сүріп отырмыз. 2022 жылғы экономикалық негізделмеген тарифті шұғыл қайта қарауды талап етіп, жергілікті атқарушы органдарға бірнеше рет жүгінгенбіз, бірақ өкінішке қарай, өтініштеріміз тиісті назар мен әрекетсіз қалып отыр», - делінген хабарламада.
Қалада қоқыс шығарудың толық тоқтап қалуын болдырмау үшін компания мәжбүрлі шараларды қабылдай бастады:
- автопарк пен экипаждарды қысқарту: күнделікті маршрутқа шығатын машиналар саны азайтылды;
- жөндеу қызметін қысқарту: техникаға қызмет көрсететін бригада азайтылды;
- барлық ресурстар негізгі автопарктің ең төменгі жұмыс қабілеттілігін сақтауға жұмылдырылды.
Сонымен қатар компания ЖЖМ, қосалқы бөлшектер жеткізушілері және салық органдары алдындағы қарыздарды өтеу үшін несие ресімдеу рәсімін бастады.
«Бұл шаралар – шешім емес, тағы бірнеше айға созуға бағытталған үмітсіз әрекет. Олар сөзсіз қызмет көрсету сапасы мен уақтылығының нашарлауына әкеледі. Біз сіздердің наразылықтарыңызды түсінеміз және туындаған қолайсыздықтар үшін кешірім сұраймыз. Біздің мақсатымыз – жұмысымызды тұрақты және сапалы орындау. Бірақ бұл үшін нақты шығындарды ескеретін тарифті қайта қарау және билік тарапынан халықтың көп миллиондық қарызын өндіру және коммерциялық нысандарды қызмет ақысын төлеуге мәжбүрлеу бойынша тиімді шаралар өте қажет», - деп хабарлады компания.
Компания адал төлеушілерге жеке алғысын білдіріп, жағдайды түсіністікпен қарауға шақырды.
«Біз сіздердің жауапкершіліктеріңіз бен қызмет ақысын уақтылы төлеулеріңізді жоғары бағалаймыз. Осы қиын кезеңде түсіністік танытуларыңызды сұраймыз. Біз жұмысты жалғастыру үшін қолымыздағы барлық ресурстарды пайдаланып жатырмыз. Осы ашық үндеуіміз проблемалардың шынайы себептерін түсінуге және дағдарыстан шығу жолын іздеу үшін күш-жігерімізді біріктіруге көмектеседі деп үміттенеміз», - деді «Caspiy Operating» ЖШС.
Еске сала кетейік, наурыз айында Ақтаудағы 18А шағынауданының тұрғындары шағымданған болатын, мемлекет басшысының бұрынғы резиденциясының қоршауының жанында бірнеше шақырымға созылған рұқсатсыз қоқыс үйіндісі пайда болып, «Таза Қазақстан» акциясы аясында аумақта сенбілік өткізуді сұраған.