Қазақстан Ақтау маңында апатқа ұшыраған AZAL ұшағының «қара жәшіктерін» (борттық өздіжазба құрылғыларын) Бразилияның Әуе оқиғаларын тергеу және алдын алу орталығына (CENIPA) беру туралы шешім қабылдады. Бұл қадам халықаралық стандарттарға және Қазақстан 1992 жылы ратификациялаған Чикаго конвенциясына сәйкес келеді.
Тергеуге 17 халықаралық сарапшы қатысады: Әзірбайжаннан 6 маман, CENIPA-дан 3 сарапшы, Мемлекетаралық авиация комитетінің 3 өкілі, Ресейден 2 маман, Embraer компаниясының 2 өкілі және Халықаралық азаматтық авиация ұйымынан (ИКАО) 1 сарапшы.
Embraer өндіруші ел ретінде Бразилияны таңдау терең техникалық сараптамаға қол жеткізуді қамтамасыз етеді. Бұл шешім сонымен қатар Қазақстанның стратегиялық шешімдер қабылдаудағы тәуелсіздігін және авиациялық оқиғаларды тергеудің халықаралық стандарттарына адалдығын көрсетеді.
Қасым-Жомарт Тоқаев Ресей және Әзірбайжан көшбасшыларымен консультациялар өткізіп, кәсіби тергеудің саяси факторлардан басымдығын растады.
«Қара жәшіктердің» Бразилияға берілуі Қазақстанның халықаралық нормаларға сәйкес объективті тергеуді қамтамасыз ете алатын сенімді халықаралық серіктес ретіндегі позициясын нығайтады.
Еске сала кетейік, 25 желтоқсанда Ақтау әуежайынан үш шақырым жерде Бакуден Грозныйға бет алған Әзірбайжан әуекомпаниясының AZAL ұшағы апатқа ұшырады. Бортта 5 экипаж мүшесін қоса алғанда, 67 адам болды.
Көлік министрі Марат Қарабаев мәлімдегендей, оқиға салдарынан 38 жолаушы қаза тауып, үш баланы қоса алғанда 29 адам ауруханаға жатқызылды.
Жуырда Әзірбайжан президенті Ильхам Әлиев ұшақтың Ресейдің әуе кеңістігінде радиоэлектрондық күрес құралдарынан зақым алғанын болжады. Осыған байланысты, оның пікірінше, ресейлік тарап кінәсін мойындап, өтемақы төлеуі керек.