5 қазан Мемлекет басшысы қорғаныс министрлігі, Мемлекеттік күзет қызметі және Президент Әкімшілігі басшылығында кадрлық тағайындаулар жүргізді.
БАС ШТАБТЫ КІМ БАСҚАРДЫ
Мемлекет басшысының өкіміне сәйкес, Айтқұрман Омарбеков қорғаныс министрінің бірінші орынбасары — Қарулы Күштердің Бас штабының бастығы болып тағайындалды.
2022 жылдан бастап ол Мемлекеттік күзет қызметі бастығының орынбасары — Арнайы операциялар күштерінің қолбасшысы қызметін атқарған.
Оның орнына Азамат Хасенов тағайындалды.
ДИПЛОМАТИЯЛЫҚ ҚЫЗМЕТТЕ ҚАНДАЙ ӨЗГЕРІСТЕР БОЛДЫ
Президент Азамат Есқараевты ҚР-ның Үндістан Республикасындағы Төтенше және Өкілетті Елшісі қызметінен, сондай-ақ Бангладеш Халық Республикасы, Бутан Корольдігі, Мальдив Республикасы және Непалдағы қоса атқарушы елші міндеттерінен босатты.
Ол Президент Әкімшілігінің Мемлекеттік-құқықтық бөлімінің меңгерушісі болып тағайындалды.
ТАҒАЙЫНДАУЛАР 3 ҚАЗАНДАҒЫ ӨЗГЕРІСТЕРМЕН ҚАЛАЙ БАЙЛАНЫСТЫ
5 қазан күнгі кадрлық шешімдер Мемлекет басшысының 3 қазан күнгі өкімдерінен кейін қабылданды, оларға сәйкес қорғаныс министрлігіндегі қызметтерден қорғаныс министрінің бірінші орынбасары — Бас штаб бастығы қызметін атқарған Қаныш Әбубәкіров, қорғаныс министрінің орынбасары қызметін атқарған Алмаз Жұмакеев және Қарулы Күштердің Әскери-теңіз күштерінің бас қолбасшысы Қанат Ниязбеков босатылды.
КОНТЕКСТ
Еске салайық, 24 қыркүйекте Каспий теңізінің жағалауында, Маңғыстау облысында өткен оқу-жаттығулар кезінде ауа райының күрт нашарлауы мен желдің күшеюінен кейін 17 әскери қызметшіні теңізге алып кетті. Оқиға салдарынан 14 адам қаза тапты.
Кейінірек қорғаныс министрлігі жүйесінің бес лауазымды тұлғасы қызметке немқұрайлы қарау және ауыр зардаптарға әкеп соққан кеме жүргізу ережелерін бұзуға байланысты қылмыстық құқық бұзушылықтар жасады деген күдікпен ұсталды.
27 қыркүйекте Даурен Қосанов қорғаныс министрі қызметінен босатылды . Жаңа министр болып бұрын Арнайы операциялар күштерін басқарған Айдос Мырзахметов тағайындалды.
