Қазақстанда медициналық қызметтерге ақы төлеу және дәрі-дәрмек сатып алу кезінде кассалық чектерде пациенттің жеке сәйкестендіру нөмірін (ЖСН) көрсетуді міндеттеу ұсынылды. Бұл денсаулық сақтау жүйесіндегі қаражаттың жұмсалуын бақылауды күшейту әрекетімен байланысты.
МИНИСТРЛІК НЕНІ ҰСЫНАДЫ
Тиісті жоба «Ашық НҚА» платформасында орналастырылды. Жобаны қаржы министрлігі премьер-министрдің Әлеуметтік медициналық сақтандыру қоры (ӘМСҚ) мәселелері жөніндегі тапсырмасына сәйкес әзірледі.
«Күтілетін нәтиже – бақылау-кассалық машиналардың чектерінде пациенттің ЖСН-ін міндетті түрде көрсету есебінен Әлеуметтік медициналық сақтандыру қоры қаражатының мақсатты және тиімді пайдаланылуын бақылау мүмкіндігін қамтамасыз ету, сондай-ақ есеп айырысудың ашықтығын арттыру және көлеңкелі экономика үлесін азайту», — делінген құжатта.
ЖАҢА НОРМА НЕ ҮШІН ЕНГІЗІЛЕДІ
Жобада чектерде пациенттің ЖСН-ін міндетті түрде көрсету медициналық қызметтер мен фармацевтика саласындағы есеп айырысулардың ашықтығын арттыруға және көлеңкелі экономика үлесін азайтуға бағытталғаны айтылған.
Сондай-ақ, бұйрықтың қабылдануы халық үшін теріс әлеуметтік-экономикалық салдарға әкеп соқпайтыны атап өтілген.
ТАЛҚЫЛАУ МЕРЗІМДЕРІ
Нормативтік актінің жобасы 2026 жылғы 29 сәуірге дейін қоғамдық талқылауға шығарылған.
КОНТЕКСТ
Еске салайық, қаңтарда үкімет отырысында премьер-министр Олжас Бектенов жеке меншік мектептер мен емханаларды субсидиялау кезінде артық қаржыландыру және осал схемаларды пайдалану жағдайларының барын атап өтті.
Одан кейін ӘМСҚ медициналық қызметтерге ақы төлеуде жүйелік бұзушылықтарды анықтаған тексерістен кейін қаржы министрлігінің қарамағына берілетіні белгілі болды. Шешім бюджеттік шығыстардың өсуі және қордың елеулі қаражатының медициналық көмек көрсету үшін нақты пайдаланылмай жинақталуы аясында қабылданды.
Ұлттық құрылтайда Президент Қасым-Жомарт Тоқаев ММС жүйесінде анықталған бұзушылықтар жүйелік сипатқа ие және басқарушылық бақылаудың әлсіздігін көрсететінін мәлімдеді. Мемлекет басшысы 2024–2025 жылдары денсаулық сақтауға 7,8 трлн теңге бағытталғанын атап өтіп, анықталған схемалардың барлық пайда алушыларын анықтауды тапсырды.