Қостанай облысының Арқалық қаласында қазан айының соңында өткен шаралардың бірінде болған жедел ішек инфекцияларымен жаппай ауру фактісі бойынша эпидемиологиялық тергеу аяқталды. Сонда медициналық мекемелерге 83 адам жатқызылды.
«Қазинформ» ХАА деректері бойынша, өңірдің санитариялық-эпидемиологиялық бақылау департаменті 82 адамның сауығып шығарылғанын хабарлады.
«Бір науқас дәрігерлердің бақылауында қалып отыр. Ауырғандарға зертханалық жолмен «сальмонеллез» диагнозы расталды — Salmonella enteritidis бактериясы бөлініп алынды», – деп мәлімдеді департаментте.
Анықтама үшін: сальмонеллез — Salmonella туысының бактериялары тудыратын жұқпалы ауру. Жұқтыру тамақ өнімдері (көбінесе шикі жұмыртқа, құс еті, сүт өнімдері) арқылы немесе ластанған беттермен байланыс кезінде болады. Бактериялар қоршаған ортада жақсы сақталады және ұзақ өмір сүреді. Олар суықтан қорықпайды, сондықтан өнімдерді мұздату жұқтырудың алдын алмайды.
Сонымен қатар, мамандар мейрамхананы тексеріп, санитариялық нормалардың елеулі бұзылыстарын анықтады. Өңірдің бас мемлекеттік санитариялық дәрігері мекеменің қызметін тоқтату және тексерулердің толық кешенінен өткенге дейін қызметкерлерді уақытша жұмыстан шеттету туралы қаулы шығарды.
Тамақ өнімдері мен ауыз суды зерттеу инфекция қоздырғышын анықтаған жоқ, алайда қоршаған орта объектілерінен алынған 40 жуындының жетісінен ішек таяқшасы табылды. Сонымен қатар, мейрамхананың екі қызметкерінен науқастардан анықталған қоздырғышпен сәйкес келетін Salmonella enteritidis анықталды.
Эпидемиологтардың сөзінше, дәл осы қызметкерлер арасындағы симптомсыз тасымалдаушылар жұқтыру көзі болуы мүмкін.
Мекеме барлық анықталған бұзушылықтар жойылғанға дейін жабық күйінде қалады. Материалдар құқық қорғау органдарына берілді.
Мейрамхана иелеріне қатысты одан әрі шаралар туралы шешім тексеру нәтижелері бойынша қабылданады: егер қылмыс белгілері болса, материалдар қылмыстық-құқықтық тәртіппен қарауға беріледі. Егер қылмыс құрамы расталмаса, кәсіпорын әкімшілік жауапкершілікке тартылуы мүмкін.
Санитариялық қызметтер жағдайдың мониторингін жалғастыруда. Арқалықтағы басқа қоғамдық тамақтану объектілерін тексеру басталған жоқ.
Еске сала кетейік, бұрын хабарланғандай, Арқалықта жергілікті мейрамханалардың бірінде өткен тойдан кейін 85 адам тамақтан уланған. Зардап шеккендер өңірдің медициналық мекемелеріне жатқызылды. Қатысушылардың бірінің сөзінше, шара туысының 60 жылдығына арналған.