Батыс Қазақстан облысының Бөрлі ауданындағы Қызылтал ауылының маңында жергілікті тұрғындар ұшқышсыз ұшу аппаратының сынықтарын тапты. Қорғаныс министрлігі тегі белгісіз ҰҰА жарылғанын растады.
Informburo.kz деректеріне сәйкес, сынықтар елді мекендерден алыс, шалғай жерден табылған. Зардап шеккендер мен материалдық шығын тіркелмеген.
«Типичный Аксай» Instagram-аккаунтында хабарлағандай, күннің бірінші жартысында куәгерлер соққыдан пайда болған шұңқырды және шашыраңқы металл бөлшектерді байқаған.
Тұрғындардың айтуынша, олардың арасында қозғалтқыш сынықтары, қалақтар, қаптама бөліктері және ескерту жазуы бар корпус болған.
«Уәкілетті мемлекеттік органдармен бірлесіп, оқиғаның мән-жайын және объектінің шығу тегін анықтауға бағытталған тексеру іс-шаралары жүргізілуде», — деп хабарлады қорғаныс министрлігі.
Ведомство сондай-ақ әуе кеңістігін бақылауды күшейту және әуе объектілерінің мемлекеттік шекараны рұқсатсыз кесіп өтуінің алдын алу бойынша қосымша шаралар қабылданғанын атап өтті.
«Осы аппараттар тиесілі болуы мүмкін шетелдік серіктестермен консультациялар жүргізілуде», — деп қосты қорғаныс министрлігі.
