Жамбыл облысы Жамбыл ауданында неміс-қазақстандық өндіруші «КнауфГипсТараз» ЖШС жер телімін алу мәселесіне тап болды.
Өңір прокуратурасының мәліметінше, инвестордың 14,5 млрд теңгеге жобасы гипсокартон және құрғақ құрылыс қоспаларын өндіру зауытын салуды көздейді, 100 жұмыс орны құрылады.
Аудандық әкімдіктің жер қатынастары бөлімі инвесторға зауыт салу және теміржолға қызмет көрсету үшін қосымша 20 га жер беруден заңсыз бас тартқаны хабарланады.
«Жамбыл ауданы прокуратурасының қадағалау актісінің нәтижесі бойынша жер алу мәселесі оң шешіліп, жобаны іске асыру жалғасты. Кінәлі лауазымды тұлға тәртіптік жауапкершілікке тартылды. Фронт-офис аясындағы жұмыс жалғасып, ерекше бақылауда», - делінген хабарламада.
Еске салайық, бұған дейін 19,4 млрд теңгеге «Май экстракциялық зауытын салу» жобасын іске асыруды жоспарлаған отандық инвестор «Atameken Agro Oils» ЖШС 252 жұмыс орнын құра отырып, алаңдағы ақаулы кәріз жүйесіне байланысты өндіріс алаңының су басу мәселесіне тап болған еді.