Солтүстік Қазақстан облысының прокурорлары өңір экономикасына 50,9 млрд теңгеден астам қаражат салғысы келетін алты инвестордың проблемалық мәселелерін шешуге көмектесті.
Ведомство баспасөз қызметінің мәліметінше, отандық инвестор «Atameken Agro Oils» ЖШС 19,4 млрд теңге тұратын және 252 жұмыс орнын құруды көздейтін «Май экстракциялау зауытын салу» жобасын жүзеге асыруды жоспарлап отыр. Алайда ол ақаулы кәріз жүйесіне байланысты өндірістік алаңның су басу мәселесіне тап болды.
«Инвестордың қатысуымен Фронт-офис жұмысы аясында ағымдағы мәселе қаралып, оны шешу жолдары әзірленді. Қадағалау органының ұсынуы бойынша әкімдік құбырларды ауыстыру шараларын қабылдап, қосымша кәрізді қайта құруға 100 млн теңге сомасында қаражат бөлді», - делінген хабарламада.
Тағы бір жағдайда, «ЕМС Agro» ЖШС және «Евразиан Милк» ЖШС инвесторларының өтініштері бойынша прокурорлар шығындарды өтеуге арналған өтінімдерді қарау мерзімдерінің бұзылғанын анықтады. Нәтижесінде жергілікті атқарушы органның қабылдаған шараларының арқасында оларға 1,2 млрд теңге төленді.
Облыстық прокуратураның назарында тағы 31 инвестициялық жоба қалып отырғаны хабарланады.