Хошимин халық соты Вьетнамның ең бай әйелдерінің бірі 67 жастағы Чыонг Ми Лан және оның 85 сыбайласы туралы іс бойынша үкім шығарды.
zakon.kz деректері бойынша, Чыонг Ми Лан - Вьетнамның ең бай жылжымайтын мүлік компанияларының бірі болып табылатын ірі Van Thinh Phat Group компаниясының төрайымы.
Сот кәсіпкер әйелді активтерді иемденгені үшін өлім жазасына кесті. Сондай-ақ, ол «банктік қызмет және банктік қызметке байланысты өзге де қызмет ережелерін бұзғаны» үшін 20 жылға, ал «пара бергені» үшін тағы 20 жылға бас бостандығынан айырылды. Жалпы жаза - өлім жазасы.
Үкімге сәйкес, Чыонг Ми Лан сондай-ақ Сайгон коммерциялық банкінің (SCB) акционері болған, ол басшылық лауазымдарға «өз» адамдарын тағайындаған. Олардың көмегімен ол банкті депозиттер мен басқа көздерден алынған капиталдар үшін пайдаланып, содан кейін ақшаны жалған несиелік келісімдер бойынша шығарып отырған.
Айыптау деректері бойынша, 2012 жылдан 2022 жылға дейін SCB Лан тобына шамамен 1 066 000 млрд донг (19,09 трлн теңге) сомасына 2500-ден астам несие берген. 2022 жылға қарай сотталушыларда 1300-ге жуық несие болған, SCB алдындағы өтелмеген қарыз 677 трлн донгтан (12 трлн теңге) асқан.
Қылмысты жасыру үшін әйел өз адамдарына Банктік қадағалау және тексеру агенттігінің лауазымды тұлғалары мен басшыларын, сондай-ақ Хошимин мемлекеттік банкінің басшыларын параға сатып алуды тапсырған. Ол Вьетнам тарихындағы лауазымды тұлғаларға берілген ең ірі параны - $5,2 млн (шамамен 2,3 млрд теңге) бергені хабарланады.
Чыонг Ми Ланнан басқа, сот оның күйеуі Лан Чу Лап Коға да үкім шығарды. Ол «Кәсіпкерлік қызметті несиелеу ережелерін бұзғаны» үшін 9 жылға бас бостандығынан айырылды. Оның немере қарындасы Труонг Хюэ Ван «Мүлікті иемденгені» үшін 17 жылға сотталды.
Чыонг Ми Ланға қатысты процесс Вьетнам тарихындағы ең ірі сот талқылауларының бірі болды. Іс материалдары жалпы салмағы 6 тонна болатын 104 жәшікті құрады. Айтпақшы, қаржылық құқық бұзушылықтар үшін әйелге өлім жазасын шығару Вьетнамда сирек кездеседі.