Ұлы Отан соғысының ардагерлеріне 9 мамырға орай біржолғы әлеуметтік көмек төленді.
Үкімет баспасөз қызметінің мәліметінше, бүгінгі күні төлемдерді Қазақстанның барлық өңірлерінің, сондай-ақ Астана, Алматы және Шымкент қалаларының ардагерлері алған. Осы мақсаттарға жергілікті бюджеттерден барлығы 187 млн теңге бөлінгені хабарланды.
Үкіметте сондай-ақ 9 мамырға арналған біржолғы төлемдердің мөлшері әр облыста жергілікті бюджеттердің мүмкіндіктері мен мәслихаттардың шешімдеріне қарай жеке белгіленетіні атап өтілді.
«Ағымдағы жылы республика бойынша біржолғы әлеуметтік көмектің орташа мөлшері 1,5 млн теңгені құрады. Оған қоса, көптеген өңірлерде орташа мөлшерден жоғары сомалар төленді: Ақмола облысында – 3 млн теңге, Ақтөбе облысында – 2 млн теңгеден астам. Абай облысында, Алматы, Қарағанды, Павлодар облыстарында және Астана мен Алматы қалаларында ҰОС қатысушылары 2 млн теңгеден алды», - делінген хабарламада.
Сондай-ақ, республика бойынша бүгінде Ұлы Отан соғысының 148 ардагері тұратыны атап өтілді. Сонымен қатар, оларға ай сайын 16 АЕК (59 072 теңге) мөлшерінде арнайы мемлекеттік жәрдемақы төленетіні белгілі болды.
Бір қызығы, егер ардагерлерге берілетін «біржолғы әлеуметтік көмектің орташа мөлшерін» (1,5 млн теңге) алып, оны барлық 148 ардагерге көбейтсе, мәлімделген 187 млн теңгенің орнына 222 млн теңге сомасы шығады.
Сонымен қатар, informburo.kz бұған дейін ардагерлерге төлемдерге 293,6 млн теңге дайындалғаны туралы хабарлағанын еске саламыз. Бұл ретте деректері белгісіз болған екі өңір есепке алынбаған. Сонымен қатар, 148 емес, 161 ардагер туралы айтылған.