Ұлыбритания Сыртқы істер министрлігі қазақстандық компанияларға арналған нұсқаулық жариялады, онда британдық санкцияларды айналып өтуге жәрдемдескені үшін ықтимал салдарлар туралы ескертеді.
«HALYQSTAN» Telegram-арнасының мәліметінше, 27 беттен тұратын құжат ведомствоның ресми сайтына орналастырылған. Ол ең алдымен Ресейге қарсы енгізілген шектеулерге қатысты. Сонымен қатар, нұсқаулық Ұлыбританияның санкциялық режиміне іліккен басқа елдерді де қамтиды.
Нұсқаулықта Ұлыбритания санкциялары оның азаматтары мен заңды тұлғалары үшін орындалуы міндетті ұлттық заңнаманың бөлігі екені атап көрсетілген. Алайда қазақстандық бизнес осы заңдардың тікелей қолданылу объектісі бола алмаса да, санкцияларды айналып өтуге ықпал ететін немесе олардың мақсаттарын бұзатын қызметке қатысқаны үшін шектеулерге тап болуы мүмкін.
«Егер сіз Ұлыбритания санкцияларын бұзуға немесе айналып өтуге көмектесетін қызметке қатыссаңыз, Ұлыбритания сізге жеке тұлға ретінде немесе сіз иелік ететін не бақылайтын ұйымдарға қатысты тікелей санкциялар енгізуі мүмкін», — делінген құжатта.
Ведомство бірқатар жағдайларда мұндай санкциялардың үшінші елдердің, оның ішінде Қазақстанның компанияларына қатысты қолданылғанын атап көрсетеді.
Нұсқаулық сонымен қатар бұзушылар үшін ықтимал салдарларды тізімдейді: халықаралық серіктестер тарапынан қызмет көрсетуден бас тарту, британдық банктердегі активтерді бұғаттау, сақтандырудан бас тарту және қаржылық қызметтерге қолжетімділікті шектеу. Ұлыбританиямен байланысы бар ешбір халықаралық компания санкция режимін бұзушылармен ынтымақтаспайтыны қосымша атап өтілген.
Бұзушылықтарға мыналар жатады:
- Ұлыбританиядан Ресейге санкциялық тауарларды экспорттау;
- Ұлыбританияға ресейлік шыққан тауарларды жеткізу;
- Ресейге тыйым салынған өнімдерді тікелей немесе жанама жеткізу;
- Ресей Федерациясының азаматтарына осындай тауарларға қолжетімділікті қамтамасыз ету.
Қазақстан Ұлыбританияның санкцияларына ресми түрде қосылмаса да және өзінің ұлттық санкциялық режимдері болмаса да, елдің кейбір заңдары санкцияларға ілінетін қызметке ұқсас қызметті реттейді. Британ тарапы сондай-ақ қазақстандық банктерге халықаралық санкцияларға іліккен клиенттермен жұмысты шектеуді ұсынды.