Премьер-министр Олжас Бектенов халықтың өмір сапасын жақсарту жөнінде кеңес өткізді «мемлекеттік қолдау шараларының тиімділігін арттыру арқылы», онда әкімдердің жұмысында нақты тұрғындардың әл-ауқатының нақты жақсару критерийі бойынша KPI (Тиімділіктің негізгі көрсеткіштері) ентізу тапсырылды.
Үкімет баспасөз қызметінің мәліметінше, бұл үшін «Отбасының цифрлық картасы» платформасы негізінде барлық қазақстандық отбасылардың әл-ауқатына төтенше және дағдарыстық деңгейлерден қанағаттанарлық және жайлы деңгейге дейінгі бес санат бойынша тұрақты мониторинг пен талдау жүргізілетін болады.
«Отбасылардың қанағаттанарлықсыз санаттан жақсарту жағына және керісінше өту динамикасына байланысты жергілікті атқарушы органдардың жұмысы бағаланады. Бүгінгі таңда отбасының цифрлық картасының ағымдағы нәтижелері БҰҰ мен жетекші халықаралық институттар тарапынан оң бағаланды», — делінген хабарламада.
Әкімдерге орта мерзімді және ұзақ мерзімді шараларды жоспарлау мен іске асыру үшін бұл құралды «үстел кітабы» ретінде пайдалану тапсырылды.
Үкімет басшысы сондай-ақ өңір әкімдеріне орталық мемлекеттік органдармен бірлесіп әрбір отбасымен атаулы жұмыс жүргізуді және жыл соңына дейін «дағдарыстық» және «төтенше» санаттарындағы отбасыларды 31,2 мың отбасына дейін қысқартуды қамтамасыз етуді тапсырды.
«Мемлекет басшысының біздің алдымызға қойып отырған міндеті – елдегі өмір сапасын жақсарту. Тетігі бар, мемлекеттік қолдау шаралары жұмыс істейді, мемлекет қажетті қаражат бөледі. Біз әкімдердің нақты адамдардың әл-ауқатын жақсартуға қосқан нақты үлесін бағалау критерийіне көшеміз. Индикаторлардың орындалуына тұрақты мониторинг жүргізіледі. Біз онлайн режимінде динамиканы көріп, қорытынды жасаймыз», – деп атап өтті Олжас Бектенов.
Сонымен қатар, кеңесте «Әлеуметтік әмиян» жобасы қаралды. Ол азаматтарға мемлекеттік қолдау көрсету шараларының ашықтығы мен уақтылығын қамтамасыз етуге мүмкіндік береді деп күтілуде. Бүгінгі күні осы жоба арқылы тұрғындарға пилоттық режимде мектептерде тегін және жеңілдікті тамақтану, сондай-ақ дәрі-дәрмектер ұсынылуда.
«Қосымша әлеуметтік маңызы бар азық-түлік өнімдерін сатып алуға атаулы көмек көрсету, мүгедектігі бар адамдар үшін оңалтудың техникалық құралдарын сатып алу, сондай-ақ ЖЖМ және тауарлық газ бағасының өсуін өтеу мақсатында халықтың әлеуметтік осал топтарына ваучерлер беру бойынша пилоттық жобаларды іске қосу пысықталуда», - делінген хабарламада.
Сонымен қатар, үкіметте білім беру қызметтерінің сапасын арттыруға бағытталған «Мектепке дейінгі ұйымдарды ваучерлік қаржыландыру» жобасы таныстырылды.
«Ақша баланың соңынан ереді» тұжырымдамасы мемлекеттік тапсырыс қаражаты ата-ана таңдағаннан кейін ғана мектепке дейінгі ұйымдарға аударылатынын білдіреді. Бұл балабақшалар арасында балалар үшін бәсекелестікті арттыруға және сыбайлас жемқорлық тәуекелдерін азайтуға мүмкіндік береді. Оқу-ағарту министрлігіне Тараз және Шымкент қалаларында ваучерлік қаржыландыру бойынша пилоттық жобаны аяқтау және оны 2025 жылғы 1 қаңтардан бастап бүкіл ел бойынша кеңейтуді қамтамасыз ету тапсырылды», - деп хабарлады үкіметте.