Денсаулық сақтау министрі Ақмарал Әлназарова Президент Қасым-Жомарт Тоқаевқа саладағы ағымдағы жағдай және алдағы кезеңге арналған міндеттер туралы баяндады.
Ақорда баспасөз қызметінің мәліметінше, министр өткен жылдың қорытындысы бойынша күтілетін өмір сүру ұзақтығы алғаш рет 75,4 жасқа жеткенін, бұл орташа әлемдік деңгейден жоғары екенін хабарлады.
«Биылғы жылдың бірінші жартыжылдығында жалпы өлім-жітім 3%-ға төмендеді. 2024 жылы ана мен бала өлімі көрсеткіштері тарихи минимумға жетіп, төмендеуін жалғастыруда», - делінген хабарламада.
Министр дәрі-дәрмек саясаты саласында дәрілік заттардың қолжетімділігін арттыру және олардың айналымын бақылауды күшейту шаралары қабылданып жатқанын атап өтті. Сонымен қатар, заңнаманы қатайту және шабуылдар кезінде жедел көмек көрсетуді қоса алғанда, медицина қызметкерлерін қорғау шаралары күшейтілуде.
2026 жылдан бастап медициналық сақтандырумен халықтың әлеуметтік осал топтарынан шамамен бір миллион адам қамтылады деп күтілуде.
Президент жыл соңына дейін «Ауылдық денсаулық сақтауды жаңғырту» ұлттық жобасы аясында нысандардың құрылысын аяқтауды, міндетті медициналық сақтандыру жүйесінің тиімділігін арттыруды, өмірлік маңызы бар дәрілік заттардың отандық өндірісін дамытуды қамтамасыз етуді, сондай-ақ медициналық көмектің сапасы мен қолжетімділігін арттыру бойынша жұмысты жалғастыруды тапсырды.