Премьер-министр Олжас Бектенов ішкі істер, денсаулық сақтау, ағарту, сондай-ақ мәдениет және ақпарат министрлерінің қатысуымен Құқық бұзушылықтардың алдын алу жөніндегі ведомствоаралық комиссияның отырысын өткізді.
Үкімет баспасөз қызметінің мәліметінше, кездесуге облыстар мен Астана, Алматы, Шымкент қалаларының әкімдері, Бас прокуратура, ҰҚК және Қаржылық мониторинг агенттігінің (ҚМА) өкілдері де қатысты.
Отырыста есірткі қылмысымен, маскүнемдікпен күрес шаралары және отбасылық-тұрмыстық қатынастар саласындағы құқық бұзушылықтардың алдын алу жұмысының тиімділігі мәселелері қаралды.
Ішкі істер министрі Ержан Саденов жарты жылда полицейлер 6,4 тонна есірткі тәркілегенін, 17 мыңнан астам есірткі сайтын бұғаттағанын, 474 есірткі қылмыскерін, оның ішінде 28 Telegram-арна әкімшісін ұстағанын хабарлады.
«Ұйымдасқан қылмыстық топтарға қатысты 21 қылмыстық іс қозғалды, оның үшеуі – трансұлттық. 11 мыңнан астам есірткіге қарсы іс-шара өткізілді. Сонымен қатар, есепті кезеңде қоғамдық орындарда алкоголь ішудің 107 мың фактісі және алкоголь айналымы саласындағы 7 мың бұзушылықтың жолы кесілді. 11 мың адамға қатысты спирттік ішімдіктерді тұтынуға тыйым салынды», - деп баяндады Саденов.
Өз кезегінде денсаулық сақтау министрі Ақмарал Әлназарова бүгінде диспансерлік есепте 17 мыңнан астам есірткіге тәуелді адам тұрғанын хабарлады. Ол соңғы бес жылда опиоидты тәуелділер саны 1,5 есеге азайғанын, бұл ретте синтетикалық стимуляторларға және аралас есірткі тұтынуға тәуелді науқастар санының артқанын атап өтті.
«2024 жылдың аяғынан бастап тәуелділік синдромынсыз зиянды тұтынуы бар адамдарға консультативтік бақылау енгізілді, шамамен 3 мың адам қамтылды. Наркологиялық көмек 20 өңірлік психикалық денсаулық орталығында, 79 қалалық және 205 аудандық кабинетте көрсетіледі, сонымен қатар Республикалық психикалық денсаулық ғылыми-практикалық орталығы жұмыс істейді. Бастапқы медициналық-санитарлық көмек деңгейінде 94 жасөспірімдер денсаулық орталығы жұмыс істейді, оған 2024 жылы 700 мыңнан астам адам жүгінді. 2025 жылы емдеу тиімділігін арттыру бойынша жаңа әдістемелік ұсынымдар бекітілді», - делінген хабарламада.
Премьер-министр құқық қорғау органдарының күш-жігеріне қарамастан, нашақорлық мәселесі, әсіресе жастар арасында сақталып отырғанын атап өтті.
«Бүкіл қоғамды толғандыратын қауіпті үрдіс – бұл жастар арасында нашақорлықтың таралуы. Өкінішке орай, ол барған сайын ауқымды айналымға ие болып келеді. Жағдай оларды таратудың жаңа тәсілдерімен – интернет, пошта жөнелтілімдері, «салымдар», жекесіз электронды төлемдер арқылы ушығып отыр. Мұның бәрі «есірткі дилері-сатушы-тұтынушы» арасындағы физикалық байланысты жояды. Сондықтан қазір таратушыларды ұстау әлдеқайда қиын», — деп атап өтті Бектенов.
Үкімет басшысы есірткі сайттарын анықтау және бұғаттау тетіктерін жетілдіру бойынша шаралар қабылдауды, сондай-ақ есірткі айналымына байланысты ақша аударымдарын бұғаттау мәселелерін пысықтауды тапсырды.
Нашақорлықты анықтау және емдеу, тәуелділік тудыратын дәріханалық препараттарды босатуды бақылауды күшейту және оңалту инфрақұрылымын, оның ішінде кәмелетке толмағандар үшін құру жұмыстарына ерекше назар аударылды.
Маскүнемдікпен күрес аясында Олжас Бектенов «салауатты елді мекендер» қозғалысын кеңейтуді тапсырды. Қазіргі уақытта алкогольді тұтынудан және дүкендерде арақ-шарап сатудан бас тартқан ауылдар саны 400-ден асады.
Бүгінде қылмыстың жартысынан көбі, әрбір үшінші бұзақылық және төртінші тонау мас күйде жасалатыны атап өтілді.