Түркістан облысының төрт тұрғыны ақбөкендерді заңсыз аулағаны үшін сотталды.
Өңір соттары баспасөз қызметінің мәліметінше, іске қатысты адамдар жоғалған жылқы үйірін іздеу үшін мотоциклдермен Ұлытау облысына барып, өздерімен бірге аңшылық мылтықтар алған.
Жылқыларды таба алмаған, бірақ аң аулауға тыйым салынғанын біле тұра, браконьерлер кейін сату үшін 15 ақбөкенді атқан. Осыдан кейін олар ұшаларды сойып, мүйіздерін бөліп, етін көлікке тиеген.
Құқық бұзушыларды «Охотзоопром» АҚ қызметкерлері ұстаған. Мемлекетке елеулі материалдық залал келтірілген – 143 млн теңгеден астам.
Сот талқылауы барысында айыпталушылар кінәлерін толық мойындап, келтірілген залалды толық көлемде өтеген.
Нәтижесінде Ұлытау облысының Қаражал қалалық соты айыпталушыларды мемлекетке елеулі залал келтіре отырып заңсыз аң аулауда, сондай-ақ ақбөкендерді заңсыз жою және тасымалдауда (ҚР ҚК 337-бабы 4-бөлігі 4-тармағы, 339-бабы 2-бөлігі 2, 5-тармақшалары) кінәлі деп таныған.
Айыпталушылардың әрқайсысы 3 жыл 6 айға бас бостандығынан айыру жазасына кесілген. Сонымен қатар оларға 5 жыл мерзімге аңшылық қызметпен айналысуға тыйым салынған.
Еске сала кетейік, бұған дейін Қызылордада ұсталған браконьерлер тобында 123 ақбөкеннің ұшасы болған. Осы факт бойынша ҚР ҚК 339-бабы «Сирек кездесетін және жойылып бара жатқан, сондай-ақ пайдалануға тыйым салынған өсімдіктер немесе жануарлар түрлерімен, олардың бөліктерімен немесе дериваттарымен заңсыз айналысу» бойынша қылмыстық істер қозғалған.