(16 ақпан 2026 | Дереккөз: Шымкент қалалық сотының баспасөз қызметі)
Шымкент қаласының Қылмыстық істер жөніндегі мамандандырылған ауданаралық сотында (ҚІМАС) 18 адамға қатысты қылмыстық істі қарау аяқталды. Сот мәліметінше, трансұлттық қылмыстық топ интернет арқылы психотроптық заттарды өндірумен және сатумен айналысқан.
ТОП ҚАЛАЙ ӘРЕКЕТ ЕТКЕН
Сот анықтағандай, тергеу анықтамаған тұлға Қазақстан аумағында және іргелес мемлекеттерде виртуалды есірткі маркеттері арқылы психотроптық заттарды өндірумен және сатумен айналысқан трансұлттық қылмыстық топ құрған.
Қатысушылардың бірі 2024 жылы Шымкентте ерекше ірі мөлшерде психотроптық заттарды дайындау бойынша зертхана ұйымдастырған. Оның туысы және танысы шикізат пен дәлелдемелерді жасыруға жәрдемдескен.
Топтың екі мүшесі 2022-2024 жылдар аралығында есірткі сатудан түскен кірістерді ерекше ірі мөлшерде криптовалютамен заңсыз операциялар арқылы заңдастырумен айналысқан.
Тағы тоғыз сотталушы топ мүшесі бола тұра, ақшаны қабылдау және аудару үшін банк карталарын беріп, ақшаны жылыстатуға көмектескен.
ТАРАПТАРДЫҢ ҰСТАНЫМЫ
Мемлекеттік айыптаушы барлық фигуранттарға бас бостандығынан айыру жазасын тағайындауды сұраған.
Қорғаушы сотталушылардың бір бөлігін ақтауды, ал қалғандарына біліктілікті жеңілдетіп, қоғамнан оқшаулаумен байланысты емес ең төменгі жазаны тағайындауды сұраған.
СОТ ШЕШІМІ
Сот 17 сотталушыны келесі баптар бойынша кінәлі деп таныды:
- ҚК 264-бабының 1 және 2 бөліктері бойынша («Трансұлттық ұйымдасқан топты құру және оған басшылық ету, оған қатысу»);
- ҚК 297-бабының 4 бөлігі бойынша («Есірткі құралдарын, психотроптық заттарды немесе олардың аналогтарын ерекше ірі мөлшерде өткізу мақсатында заңсыз дайындау, қайта өңдеу, сатып алу, сақтау, тасымалдау не өткізу»);
- ҚК 214-бабының 2 бөлігі бойынша («Заңсыз кәсіпкерлік»);
- ҚК 218-бабының 3 бөлігі бойынша («Қылмыстық жолмен алынған ақшаны және өзге мүлікті заңдастыру (жылыстату)»);
- ҚК 432-бабы бойынша («Қылмысты жасыру»).
Кінә куәгерлердің айғақтарымен, сараптама қорытындыларымен, мойындау айғақтарымен және істің өзге де материалдарымен расталған.
Жеңілдететін мән-жайлар ретінде кәмелетке толмаған балалардың болуы, өкіну және тергеуге жәрдемдесу танылды. Ауырлататын мән-жайлар анықталмаған.
Зертхананы ұйымдастырушы 16 жыл бас бостандығынан айыруға сотталды. Қалғандары 2,5 жылдан 11 жылға дейін бас бостандығынан айыру жазасын алды.
Екі сотталғанға ҚК 74-бабы бойынша («Жазаны өтеуді кейінге қалдыру») екі жыл мерзімге жазаны өтеуді кейінге қалдыру берілді. Бір фигурант амнистия бойынша босатылды. Тағы екеуіне 11 млн теңге мөлшерінде айыппұл салынды.
Бір сотталушы кінәсі дәлелденбегендіктен толық ақталды.
Үкім заңды күшіне енген жоқ.