Өскеменде ШҚО қылмыстық-атқару жүйесі департаменті (ҚАЖД) қызметкерлері сотталды.
Антикор баспасөз қызметінің мәліметінше, №17 мекеме бастығының бұрынғы орынбасары мен аға инспекторы 5,8 млн теңге жымқырғаны үшін кінәлі деп танылды.
Олардың тұрғын үй комиссиясына жылжымайтын мүліктің жоқтығы туралы көрінеу жалған мәліметтер бергені хабарланды.
Сот оларға 3 жыл 6 ай мерзімге бас бостандығын шектеу түріндегі жаза тағайындады, сондай-ақ мемлекеттік қызметте және квазимемлекеттік секторда лауазымдарды атқару құқығынан өмір бойына айырды. Сонымен қатар сотталғандар әділет майоры мен лейтенанты атақтарынан айырылды.
Еске сала кетейік, қазан айының ортасында Қарағандыда үкім шығарылып, Қарағанды облысы және Ұлытау облысы бойынша қылмыстық-атқару жүйесі департаментінің (ҚАЖД) аға жедел уәкілі сотталған адамды азаптағаны үшін кінәлі деп танылды.
Тамыз айында Ұлытау облысында әскери қызметшілер мен қылмыстық-атқару жүйесі комитетінің (ҚАЖК) қызметкерлері азаптау қолданғаны үшін сотталды. Мекеме бастығы мен оның орынбасарына 6,6 жыл бас бостандығынан айыру жазасы тағайындалды. Мекеменің бес қызметкері мен төрт әскери қызметшісіне 4 жылдан 4,5 жылға дейін бас бостандығынан айыру жазасы тағайындалды.
Шілде айында белгілі болғандай, Өскемен қаласының №2 соты ШҚО бойынша ҚАЖД бастығының орынбасары Зиянов Қ.А. қатысты үкім шығарды. Ол лауазымдық өкілеттігін теріс пайдаланғаны үшін кінәлі деп танылды. Оның сотталған адамға – «РОП операторы» ЖШС бұрынғы басшысы Құмарғалиев М. жазасын өтеуге қолайлы және жеңілдікті жағдайлар жасауға ықпал еткені хабарланды.