Павлодар облысы Ақсу қаласының ауданаралық соты аса ірі көлемде бюджет қаражатын жымқыру ісі бойынша үкім шығарды. Бұрынғы қалалық құрылыс бөлімінің басшысы мен мердігер ұйымның басшысы 291 млн теңгеден астам қаражатты жымқыруда кінәлі деп танылды.
Павлодар облысы прокуратурасының баспасөз қызметінің мәліметінше, процесс мемлекеттік органдар өкілдерінің қатысуымен өтіп, көрсетпелі сипатта болды.
Белгілі болғандай, өткен жылы Ақсу прокуратурасы төрт дене шынықтыру-сауықтыру кешенінің құрылысы бойынша орындалған жұмыстар актілеріне заңсыз қол қою фактісін анықтады. Нысандар пайдалануға берілді, алайда іс жүзінде жұмыстардың бір бөлігі орындалмаған.
Осыған қарамастан, бюджеттен бөлінген қаражат мердігерге аударылды. Мемлекетке келтірілген залал 290 млн теңгеден астамды құрады. Ақшаның бір бөлігін фигуранттар үлестес ұйымдардың шоттарына жіберген.
Нәтижесінде бұрынғы құрылыс бөлімінің басшысы мен мердігер 7 жыл бас бостандығынан айыруға сотталды. Сот үкімі әлі заңды күшіне енген жоқ.
Еске салайық, бұған дейін Ақмола облысында да мердігер мен құрылыс бөлімінің басшысы сотталған болатын. Фигуранттар көлемі мен құны асыра көрсетілген, іс жүзінде жұмыстардың бір бөлігі орындалмаған жалған орындалған жұмыстар актілерін ұсынған. Нәтижесінде мемлекет 152 млн теңге көлемінде залал шеккен.