Батыс Қазақстан облысында сумен жабдықтау жүйелерін салу және реконструкциялау бойынша 11 жобаны іске асыруға Арнайы мемлекеттік қордан 5,5 млрд теңге бөлінді. Қаражат Президенттің әлеуметтік маңызы бар инфрақұрылымды дамыту жөніндегі тапсырмаларын орындау аясында жіберілді.
Үкімет баспасөз қызметінің мәліметінше, қаржыландырудың негізгі сомасы 4,3 млрд теңге мөлшерінде 9 нысанға бөлінетін болады.
Қаратөбе ауданының Төлен, Сәуле және Қарақамыс елді мекендеріне тармақ тарта отырып, магистральдық сумен жабдықтау жүйелерін салуға 1,8 млрд теңге жіберілді.
Теректі, Қаратөбе аудандарының, сондай-ақ Бәйтерек ауданының 8 ауылында сумен жабдықтау желілерін тартуға 2,5 млрд теңге бөлінді.
Сондай-ақ 1,2 млрд теңге Бәйтерек ауданы Қирсанова ауылының тұрғындарын сумен жабдықтауды қамтамасыз етуге және Жәнібек ауданындағы Орда топтық су құбырын реконструкциялауға жіберілді. Бүгінгі таңда жұмыстар 60%-ға орындалғаны хабарланды.
«Бұл жұмыс Мемлекет басшысының халықты сапалы ауыз сумен 100% қамтамасыз ету жөніндегі тапсырмасын орындауға бағытталған. Өнеркәсіп және құрылыс министрлігінің деректері бойынша, Батыс Қазақстан облысында қолжетімділіктің ағымдағы деңгейі қалаларда 100%, ал ауылдарда 97% құрайды», - делінген хабарламада.
Үкіметте атап өткендей, жалпы Арнайы мемлекеттік қордан 400-ден астам әлеуметтік жобаны салуға 375 млрд теңге жіберілді.
«Мектептер, ауруханалар, спорт кешендері, сумен жабдықтау нысандары және басқалары салынуда. Қазірдің өзінде 44 нысан аяқталып, азаматтар үшін ашылды», - деп қорытындылады үкімет.
Еске сала кетейік, наурыз айында үкімет Қызылорда облысы Арал ауданында сумен жабдықтау жүйелерін салуға және жаңғыртуға Арнайы мемлекеттік қордан шамамен 4,2 млрд теңге бағыттады.
Сәуір айында үкімет Ақмола облысы Қосшы және Макинск қалаларының тұрғындарын сумен жабдықтауды қамтамасыз ету үшін Арнайы мемлекеттік қордан 1 млрд теңге бөлді.
Шілде айында қордан Түркістан облысында сумен жабдықтау желілерін салуға және жаңғыртуға 20 млрд теңгеден астам бөлінді.
Тамыз айында үкімет Абай облысында сумен жабдықтау желілерін тартуға қордан 10 млрд теңгеден астам бөлу туралы шешім қабылдады.