Орал қаласының әкімшілік құқық бұзушылықтар жөніндегі мамандандырылған сотында мас күйінде көлік жүргізгені үшін ұсталған полиция майорының ісі қаралды. Ол қызметтік көліктің рөлінде болған, әріптестерінің тоқтау туралы талабына бағынбай, жасырынуға тырысқан.
«Мой Город» басылымының мәліметінше, құқық бұзушыға екі айып тағылған: мас күйінде көлік жүргізу және полиция қызметкерлерінің талабын орындамау. Сотта ол рөлде отырғанын жоққа шығарған.
Нәтижесінде сот оған жеті жыл мерзімге жүргізуші куәлігінен айыру және 157 280 теңге көлемінде айыппұл салу түріндегі жаза тағайындады.
Сонымен қатар, іс материалдары Батыс Қазақстан облысы полиция департаментінің басшылығына жіберілді. Ведомство іске қатысты адамның қызметтен теріс себептермен шығарылғанын атап өтті.
«БҚО ПД ұстанымы қатаң: полицияда тәртіп пен заңның бұзылуына жол берілмейді және ол қатаң әрі сөзсіз тоқтатылады», — деп мәлімдеді департаментте.
Еске сала кетейік, бұрын Жамбыл облысында пара алуға күдіктелген жоғары лауазымды полиция қызметкерлері ұсталған болатын. ФБРК дереккөздерінің мәліметінше, бұл облыстық полиция департаментінің экстремизмге қарсы іс-қимыл басқармасының бастығы полиция полковнигі Қанат Нұрмағамбетов және оның орынбасары полиция полковнигі Оразалы Құдабаев туралы болып отыр.