Павлодар прокуратурасы жергілікті мемлекеттік мекемелер мен кәсіпорындар тарапынан мемлекеттік сатып алу саласындағы бұзушылықтарды анықтады.
Ведомствоның баспасөз қызметінің мәліметінше, тапсырыс берушілер заңда көзделген 30 күндік мерзімді өткізіп алып, жеткізушілерді адал емес деп тану туралы талап қоюмен сотқа бірнеше рет жүгінбеген.
Хабарланғандай, әрекетсіздік адал емес сатып алу қатысушыларының, тіпті шарт талаптарын орындамаса да, жауапкершіліктен жалтаруына жағдай жасаған.
Мысалы, «Ақсу қаласының мектеп-лицейі» КММ 2024 жылғы тамызда «KAZ SERVICE PVL» ЖШС тарапынан шарт талаптарының бұзылғанын білген, алайда талап қоюды бес айдан кейін берген. Нәтижесінде сот белгіленген мерзімнің өтіп кетуіне байланысты талаптарды қанағаттандырудан бас тартқан.
Прокуратура ұсынымы енгізілгеннен кейін ішкі мемлекеттік аудит департаменті мектеп директорын айыппұл түріндегі әкімшілік жауапкершілікке тартқан.
Барлығы осыған ұқсас бұзушылықтар бойынша 19 лауазымды тұлға әкімшілік жауапкершілікке тартылғаны атап өтіледі.
Еске сала кетейік, бұған дейін Жоғары аудиторлық палата Солтүстік Қазақстан облысында шамамен 28,3 млрд теңге сомасына қаржылық бұзушылықтарды, сондай-ақ шамамен 112,4 млрд теңге сомасына бюджетті тиімсіз жоспарлау мен пайдалануды анықтады.
Аудиторлар мемлекеттік сатып алу саласында, оның ішінде шамамен 5,5 млрд теңге сомасына конкурстарсыз бір көзден шарттар жасасу және жұмыс көлемдерін қосалқы мердігерлікке беру бойынша шектеулерді сақтамау бұзушылықтарын анықтағаны атап өтілді.