Nestle компаниясы табиғи минералды су деген атаумен нәжіс бактериялары мен пестицидтері бар сүзілген суды сатқан.
Бұл туралы Informburo.kz француздық Mediapart басылымына сілтеме жасап хабарлады. Белгілі болғандай, жыл басында Les Echos газеті Nestle Water France компаниясының ластанған суды тазарту үшін ультракүлгін және көмір сүзгілерін қолданатынын жазған.
Еуропалық Одақ елдерінде мұндай әдістер тек ағын суды сүзуге рұқсат етілген, бірақ бөтелкеге құйылған минералды су өндіруге рұқсат етілмейді.
Зерттеу нәтижелері компанияның Францияда пайдаланатын су көздерінің нәжіс бактерияларымен, ішек таяқшасымен және пестицидтермен ластанғанын көрсеткені хабарланады.
Журналистердің шамамен есептеуінше, компанияның соңғы 15 жылдағы әрекеттерінен келтірілген шығын шамамен 3 млрд еуроны құраған.
Өз кезегінде тұтынушылардың құқығын қорғайтын еуропалық Foodwatch France құқық қорғау тобының өкілі Ингрид Крагл Nestle компаниясының бұл суды Францияда ғана емес, көптеген жылдар бойы сатқанын мәлімдеді.
«Nestlé, анық, ондаған жылдар бойы «табиғи минералды суға» еш қатысы жоқ миллиардтаған бөтелке суды сатты: Францияда, Еуропада, тіпті бүкіл әлемде, ал тұтынушылар бұдан мүлдем бейхабар болды», – деді Ингрид Крагл.
Foodwatch France осы іс бойынша француз билігінің әрекеттеріне тергеу жүргізу туралы есеп жариялауды жоспарлап отыр.