Мәжіліс депутаты Мұрат Әбенов Әлихан Смайылов басқаратын Жоғары аудит палатасын (ЖАП) Назарбаев университетіндегі 73 млрд теңгенің жымқырылуын жасырды деп айыптады.
«Неліктен Смайылов басқаратын Жоғары аудит палатасы Назарбаев университетіндегі 73 млрд теңгені жымқыру фактілері туралы ақпаратты жасырып отыр?», – деп жазды мәжілісмен өзінің Facebook-тегі парақшасында.
Оның айтуынша, ЖАП бұрын жүргізілген аудиттің мәліметтерін жасырып, депутаттарға бюджет қаражатының заңсыз жұмсалу себептерін зерттеуге мүмкіндік бермей отыр.
Айта кетейік, 2023 жылдың қазан айында премьер-министр қызметін атқарған кезде Әлихан Смайылов Назарбаев университетінің Жоғары қамқоршылық кеңесін басқарды, ал 2024 жылдың сәуірінде ол ЖАП төрағасы болып тағайындалды.
Еске салайық, бастапқыда ЖАП-тың 2022-2024 жылдардағы тексеру нәтижелерін жариялауға Мәжіліс депутаты Марат Башимов шақырған болатын. Оның айтуынша, ведомство сайтында соңғы аудит қорытындысы 2022 жылдың 11 тамызында жарияланған.