Мәдениет және спорт бұрынғы министрі Арыстанбек Мұхамедиұлына тиесілі тағы үш нысанды мемлекет меншігіне қайтару жоспарлануда. Олардың жалпы құны 3,5 млрд теңгені құрайды.
Бас прокуратураның баспасөз қызметі 2019 жылы Мұхамедиұлымен байланысты компанияға сатылғанын еске салды: Су және қолданбалы спорт түрлері бойынша республикалық жоғары спорт шеберлігі мектебі 332 млн теңгеге сатылған.
«Сатуға дейін Алматыда орналасқан кәсіпорын 662 млн теңгеге бағаланған. Алайда мүліктік кешеннің нақты нарықтық құны 1,213 млрд теңгені құраған, айырма сомасы кәсіпорынның ұзақ мерзімді активтерінің төмендетілуінен көрініс тапты», - делінген хабарламада.
Алматы прокуратурасының талап-арызы бойынша сот кәсіпорынды сатып алу-сату шартын жарамсыз деп танығаны хабарланды.
Сонымен қатар Астана мен Алматыда Мұхамедиұлымен байланысты компанияларға бұрын сатылған, құны 3,5 млрд теңгеден асатын тағы үш нысанды мемлекет меншігіне қайтару туралы сот талқылаулары жүріп жатыр.
«Ұлытау облысы прокуратурасының тексеруі аясында Қарағанды мемлекеттік мүлік департаментінің басшыларының бірі сотқа берілді (Қылмыстық кодекстің 371-бабы 2-бөлігі бойынша лауазымдық міндеттерді орындамау). Ол мемлекет меншігін иеліктен шығару кезінде абайсыздық танытып, мемлекетке 184 млн теңге залал келтірді деп айыпталуда», - делінген хабарламада.
Сонымен қатар жүйелік кемшіліктер мен олқылықтар үшін мемлекеттік мүлік және жекешелендіру комитетінің 35 лауазымды тұлғасы, оның ішінде өңірлік департаменттердің алғашқы басшылары жазаланды.
Еске салайық, бұған дейін сот Мұхамедиұлын пара беруге оқталуда кінәлі деп танып, оның бұрынғы жаза мерзімін 8 жылдан 11 жыл бас бостандығынан айыруға ауыстырған болатын.
Оның әйелі Галия Искакова парақорлыққа делдалдық жасағаны үшін 6 ай бас бостандығынан айыруға сотталды. Алайда кейін сот үкімді өзгертіп, Искакованың негізгі жазасын өтелді деп санап, оны қамаудан босатты.