Ауыл шаруашылығы министрі Айдарбек Сапаров Ресейге Қазақстаннан әкелінген тауық етінен қауіпті бактериялар табылғаны туралы Россельхознадзордың бұрын жариялаған ақпаратын жоққа шығарды.
Informburo.kz деректері бойынша, Сапаров өзіне бағынысты ведомство етке қосымша тексеру жүргізіп, ешқандай бұзушылықтар анықтамағанын айтты.
«Бұрын экспорттағандай, қазір де экспорттап жатырмыз. Бірақ сақтандыру үшін Ресей тарапынан маркетингтік цифрлық нарықта бақылау күшейтілді. Алайда мұнда, бәлкім, бәсекелестік және басқа да мәселелер бар. Жалпы, жұмыс жүріп жатыр, экспорттап жатырмыз, ешқандай проблема жоқ», – деді министр.
Министр Ресейдің ветеринариялық қадағалау қызметінің сайтындағы тиісті жарияланымды «техникалық қателікпен» түсіндірді.
Еске салайық, қаңтар айының соңында Россельхознадзор алдымен Ресейдің Барнаул қаласында қазақстандық Макинск құс фабрикасы өндірген бройлер балапан етінің партиясынан листерия бактериялары табылғаны туралы жариялап, кейін ақпаратты жойды.