В Көксарай ауылында Түркістан облысы Отырар ауданында лейшманиоз індетінің өршуіне байланысты 118 тұрғын дәрігерлердің бақылауында.
______________
Анықтама үшін: лейшманиоз – қарапайым паразит тудыратын жұқпалы ауру.
Informburo.kz мәліметінше, ауырғандардың арасында ересектер мен балалар бар. Ауыл тұрғындары инфекцияның таралуын Көксарайға жақын орналасқан ірі уран өндіруші кәсіпорын жіберген күкірт қышқылының төгілуімен байланыстырады.
«Алғашында жара маса шаққанға ұқсайды – кішкентай және қызыл. Кейін ірің пайда болады. Содан кейін жара үлкейіп, ауырады. Сосын ішінде құрт жүргендей сезім болады», – дейді ауыл тұрғыны Мөлдір Жайлаубаева.
Өз кезегінде экологтар 600 шаршы м аумақта қышқылдың төгілу фактісін растады.
«Департамент экологиялық залалды жою бағдарламасын әзірлеуде. Сондай-ақ барлық жерді толық тазалап, қалпына келтіруді талап етті», – деді Түркістан облысы бойынша бас экологиялық инспектор Нұржан Нұрболатұлы.
Еске сала кетейік, күндер бұрын желіде бейнежазба тарай бастаған еді, онда Түркістан облысы Отырар ауданындағы «ЗАРЕЧНОЕ» БК» АҚ кенішінде «Қазатомпром» ҰАК» АҚ қызметкерлері күкірт қышқылы қалдықтарынан құтылғаны көрінеді.
Бейнеролик авторы мұның экологиялық заңнаманы бұзу арқылы жүргізілгенін мәлімдеді. Кәсіпорында барлық мән-жайды зерделеу үшін ішкі қызметтік тергеу басталғаны хабарланды.