Мәжіліс депутаты Магеррам Магеррамов алимент төлеуден жалтарғандар есебінен толықтырылатын Мемлекеттік алимент қорын құруды ұсынды.
zakon.kz деректеріне сәйкес, мәжілісмен депутаттарға бұрынғы күйеулерінен алимент өндіре алмай жүрген әйелдерден үнемі көптеген өтініштер түсетінін айтты.
«2022 жылы алимент бойынша берешек 13,8 трлн теңгені құрады. 2023 жылы алимент бойынша берешек 20,8 трлн теңгеден асты. 2024 жылғы 1 қаңтардағы жағдай бойынша алимент өндіру туралы 8 мыңнан астам сот шешімі мүлде орындалмай отыр. Осы өткір әлеуметтік мәселені шешу үшін қабылданған барлық күш-жігер нәтиже бермеді. «Алимент төлеу бойынша отыз қадам» бағдарламасы тиімсіз, Сот орындаушыларының Республикалық палатасы қабылдаған шаралар нәтижесіз», – деді ол.
Депутаттың айтуынша, қордың негізгі мақсаты алименттерін үш айдан астам алмаған балаларға төлем жүргізу болады. Мемлекетке төленген сомаларды өтеу алимент төлемеушілерден қаражат өндіру арқылы жүзеге асырылады.
Айта кету керек, депутат Маггерам Магеррамов 2023 жылдың сәуірінде де осындай ұсыныспен шыққан болатын. Сонда оған бюджет қаражатының тапшылығына байланысты бас тартылды.
press.kz хабарлағандай, әділет министрлігіне сілтеме жасап, соңғы бір жылда алимент төлеушілердің саны 225 мыңнан 326,3 мыңға дейін өскен. 2024 жылғы 1 ақпандағы мәлімет бойынша, 16 197 ата-ана қасақана борышкерлер ретінде тіркелген.
«Алимент төлемеудің негізгі себептері – борышкерлердің ресми жұмыс орнының, кірістері мен мүлкінің болмауы. Алимент төлеуден әдейі жалтаратындар да бар. Бүгінде электронды әмияндардан, букмекерлік компаниялардан, бағалы қағаздар нарығынан, желілік маркетингтен және такси қызметтерінен жасырын және тұрақты кірістері бар қасақана борышкерлерді анықтаймыз. Біз әртүрлі қызмет көрсететін, оның ішінде мобильді қосымшалар арқылы жолаушылар тасымалдаумен айналысатын борышкерлердің кірістерін анықтау мәселесін пысықтап жатырмыз», — деп хабарлады минюстен.
Ведомство қазіргі уақытта алимент төлеушілерге нақты кірістерін жасыруға көмектесетін жұмыс берушілерге қатысты қылмыстық жауапкершілік енгізу мәселесі қаралып жатқанын да атап өтті.