Маңғыстау облысының әкімі Нұрдәулет Қилыбай аппараттық кеңесте ірі компаниялар мен шетел қатысы бар кәсіпорындар халықтың әл-ауқатын жақсартуға үлес қосуы керектігін мәлімдеді.
Informburo.kz деректері бойынша, әкім өңірде 208 жер қойнауын пайдаланушы компания жұмыс істейтінін айтты. Оның 152-сі минералды ресурстарды, ал 56-сы мұнай өндірумен айналысады.
Экономика және бюджеттік жоспарлау басқармасының басшысы Марина Альбекованың хабарлауынша, тек екі мұнай компаниясы өнімді бөлу туралы келісімге ие. 24 компания бюджетке өз өнімінің 1%-ын аударады.
«Біз облыстағы осы 56 кәсіпорынның дамуына және өркендеуіне кедергі келтірмейміз. Бірақ біз осы өңірде жұмыс істейтіндіктен, кірістерімізді халық арасында бөлуіміз керек. Барлығын бір бюджетке сыйғызу мүмкін емес. Тұрғындарға көп нәрсе жетіспейді. Сондықтан ірі компаниялар, шетел қатысы бар кәсіпорындар өз кіріс көздеріне сәйкес халықтың әл-ауқатын жақсартуға үлес қосуы тиіс. Өз тарапымыздан әкімшілік көмек көрсетеміз», – деп қорытындылады Қилыбай.