Маңғыстау облысы Жаңаөзен қаласында мемлекеттік кірістер басқармасының қызметкері құмар ойындарға қатысқаны үшін жұмыстан босатылды.
Lada.kz мәліметінше, өңірдегі Мемлекеттік қызмет істері агенттігі департаментінде мемлекеттік қызметші «Netbet» ЖШС арқылы ставка жасағаны хабарланды.
Тексеру барысында ер адам платформаға 2020 жылдың шілдесінде тіркеліп, 2025 жылдың көктемінде бірнеше рет шотты толықтырып, ойнағаны анықталды.
Қалалық басқарманың тәртіптік комиссиясы мемлекеттік қызмет және сыбайлас жемқорлыққа қарсы шектеулер туралы заңнаманы бұзғаны үшін оны лауазымынан босатуды ұсынды. Ведомство басшысының бұйрығымен қызметкер жұмыстан босатылды.
Еске сала кетейік, бұған дейін Шымкентте уәкілетті органдар құмар ойындарға қатысы бар 54 қызметкерді анықтағаны хабарланған болатын. Оның 30-ы мемлекеттік қызметшілер болып табылады.