Мемлекеттік квазисектордың жекелеген субъектілерінің қарыз қаражаттарын пайдалану кезіндегі бұзушылықтарды Жоғары аудит палатасы (ЖАП) қызметкерлері Маңғыстау және Түркістан облыстарында анықтады.
«Қарыз қаражаты тартылған инфрақұрылымдық нысандарды, тұрғын үйді салу және жаңғырту кезінде нәтижелерге қол жеткізілмеген фактілер анықталды. Жекелеген жағдайларда тартылған қарыздар салым бойынша пайыздар түрінде қосымша кіріс алу үшін депозиттерге орналастырылды, бұл қаражаттың мәлімделген мақсаттардан ауытқуына әкелді», - делінген хабарламада.
Осы өңірлердегі тексерулер нәтижесінде сарапшылар қарыз қаражатын пайдалануды, сондай-ақ несиелік міндеттемелерді өтеудің уақтылығын бақылаудың жеткіліксіздігін атап өтті.
Маңғыстау облысында аудиторлар 5,5 млрд теңге көлемінде қаржылық бұзушылықтарды, 869 млн теңгеге сыртқы қарызды тиімсіз жоспарлау мен пайдалануды, 6,7 млрд теңгеге бюджеттік несиені тиімсіз пайдалануды анықтады. Екі лауазымды тұлғаға 3,3 млн теңге мөлшерінде айыппұл салынып, әкімшілік жауапкершілікке тартылды.
Түркістан облысында аудиторлар 10,5 млн теңге көлемінде қаржылық бұзушылықтарды, 4,8 млрд теңгеге бюджет қаражаты мен активтерін тиімсіз пайдалануды анықтады.
Естеріңізге сала кетейік, шілдеде ревизиялық комиссия Астана шетіндегі инженерлік-коммуникациялық инфрақұрылымды дамытуға бөлінген қаражаттың тиімділігіне мемлекеттік аудит жүргізді. Тізімге жалпы сомасы 21,4 млрд теңге болатын тиісті бюджеттік бағдарламалар енгізілді. Тексеруден кейін сарапшылар 1,4 млрд теңге көлемінде қаржылық бұзушылықтарды, 3 млрд теңге мөлшерінде бюджеттің игерілмеуін, сондай-ақ 5 млрд теңгенің тиімсіз пайдаланылғанын анықтады.
Тамызда ЖАП құрылыс саласындағы баға белгілеу аудитін аяқтады, нәтижесінде Қазақстанда өткен жылы құрылыс жұмыстарының жалпы көлемі 7,6 трлн теңгеге жетіп, 2022 жылмен салыстырғанда 21%-ға өскені анықталды.
Сонда аудиторлар бұл салада 1,3 млрд теңге көлемінде қаржылық бұзушылықтарды, 14,2 млрд теңгеден астам бюджет қаражатын тиімсіз жоспарлау мен пайдалануды, сондай-ақ 530 млн теңге көлемінде экономикалық шығындар мен ұтылған пайданы анықтады.
Қазан айының ортасында ішкі мемлекеттік аудит комитетінің (ІМАК) төрағасы Ержан Мыңжасаров айтқандай, жыл басынан бері Алматы облысында ведомство қызметкерлері 170,2 млрд теңге сомасына 465 электрондық аудит жүргізіп, сыбайлас жемқорлықтың алдын алуға бағытталған 758 іс-шараны іске асырды.