Прокуратура міндетті әлеуметтік медициналық сақтандыру (МӘМС) жүйесінде Түркістан облысында қаражатты заңсыз алу және жұмсау фактілерін анықтады. Тексерулер көрсеткендей, бірқатар жағдайларда медициналық қызметтер лицензиясыз ресімделген немесе мүлдем жалған сипатта болған.
ТЕКСЕРУ НЕНІ АНЫҚТАДЫ
Қадағалау барысында консультациялық-диагностикалық қызметтердің сапасыз және тиісінше көрсетілмеген жағдайлары, оның ішінде тиісті лицензияларсыз көрсетілгені анықталды.
Жеке клиникалардың бірінде рұқсат құжаттарынсыз әртүрлі медициналық бағыттар бойынша 28 мыңнан астам консультация өткізілген. Жалпы сомасы 91 млн теңгені құрады.
Осы факт бойынша материалдар ҚР ҚК 214-бабы («Заңсыз кәсіпкерлік») бойынша Сотқа дейінгі тергеп-тексерудің бірыңғай тізілімінде тіркелді. Тергеуді аумақтық экономикалық тергеу департаменті жүргізді.
Кейін іс залалдың толық өтелуіне байланысты акталмайтын негіздер бойынша тоқтатылды.
ЖАЛҒАН СТОМАТОЛОГИЯЛЫҚ ҚЫЗМЕТТЕР
Сонымен қатар, 203 млн теңге сомасына стоматологиялық қызметтердің жалған жазылуы анықталды. Қадағалау органының мәліметінше, екі аффилирленген клиника үш дәрігерді формальды түрде тіркеп, электронды төлем жүйесіне жүкті әйелдер мен балаларға көрсетілгендей 40 мың стоматологиялық қызмет туралы жалған деректерді енгізген.
«Тексерулер кезінде бір стоматологтың бір күнде бірнеше ондаған пациентке әртүрлі клиникаларда бір уақытта «қызмет көрсеткен» жағдайлары анықталды», — деп атап өтті қадағалау органы.
Аталған фактілер бойынша арнайы прокурорлар ҚР ҚК 190-бабы («Алаяқтық») бойынша сотқа дейінгі тергеп-тексеру жүргізді. Материалдар сотқа жіберілді.