Зеренді ауданының әкімдігі (Ақмола облысы) әлеуметтік желілерде тараған, көктемгі су тасқынынан кейін жол учаскелерінің бүлінгенін көрсететін бейнежазбаға түсініктеме берді.
Бұған дейін «Sinegor.kz» Instagram-аккаунтында Исаковка-Костомаровка жолының бейнежазбасы жарияланған еді. Кадрларда үлкен шұңқырлар мен ойықтар көрінеді.
«Көктемгі су тасқынынан кейін біздің жолдарымыз осылай болып қалды. Бұрын жолдар жаман да, жақсы да емес еді, бірақ шағымданбайтын едік, ал қазір жүру де, өту де мүмкін емес. Мұның бәрі қашан жөнделеді? Осы ауылдарға баратын жол да көңіл көншітпейді», - делінген хабарламада.
«Қазинформ» ХАА мәліметінше, Зеренді ауданының әкімдігі жолдың ауыр жүк көліктерімен бүлінгенін мәлімдеген.
«Көктемгі егіс жұмыстарының басталуына байланысты ауыл шаруашылығы тауарын өндірушілер тұқым себу материалын тасымалдауды жүзеге асырады. Жер асты сулары мен жолдың ісінуі салдарынан жол ауыр жүк көліктерімен бүлінген», - деді ведомствода.
Сәуір айының соңында ауылдық округ әкімі жергілікті тұрғындармен жиналыс өткізіп, оның қорытындысы бойынша жолдың аталған учаскелерінде 2025 жылғы 11 мамырдан кейін қалпына келтіру жұмыстарын жүргізу туралы шешім қабылданғаны атап өтіледі.
«Мемлекеттік сараптамадан өткен "Көкшетау – Атбасар – Викторовка – Костомаровка – Исаковка – Уялы трассасынан аудандық маңызы бар автомобиль жолын орташа жөндеу" жобасы әзірленген», - делінген хабарламада.
Белгілі болғандай, жобаның құны 1,2 млрд теңгені құрайды. Аудандық ТКШ бөлімі облыстық органдарға қаржыландыруға өтінім берген.
Еске сала кетейік, 2025 жылғы ақпанда Tasqyn су тасқынын болжау жүйесі пайдалануға берілген еді. Су ресурстары және ирригация министрлігі алғашқы болжамдар наурыз айының басында пайда болады деп уәде еткен, бірақ тәжірибе көрсеткендей, бұл нақты емес болжамдардың өзі елдің әртүрлі аймақтарында болған көптеген су басулардың алдын алуға көмектеспеді.
Шындық ведомствоның оптимистік есептерін жоққа шығарды: бірнеше аймақта (Солтүстік Қазақстан, Ақтөбе, Қостанай, Ақмола, Шығыс Қазақстан облыстары) елеулі су басулар байқалды. Жолдар шайылып, елді мекендер су астында қалып, көлік қатынасы бұзылды.
Тұтас ауылдар оқшауланып қалды, ал су ресурстары және ирригация министрі Нұржан Нұржігітов Tasqyn-ның «тиімділігі» туралы айтты. Сонымен қатар, болжау жүйесінің нақты құны мен оның жұмысының нақты нәтижелері әлі күнге дейін белгісіз болып отыр.