Маңғыстау облысында мұнай-сервистік компаниялардың басшыларын ұстау жалғасуда.
«Маңғыстау облысының прокуратурасы уәкілетті органдармен бірлесіп, мұнай-газ саласындағы жекелеген кәсіпорындардың қызметіне тексеру жүргізуде», - деп хабарлады ведомствоның баспасөз қызметі.
Белгілі болғандай, «Ойл Транспорт Корпорейшн» ЖШС лауазымды тұлғалары мердігер компанияның шығыстарын бюджет қаражаты есебінен 700 млн теңгеден астам сомаға негізсіз өтеген.
Сонымен қатар, мердігерлерге көрсетілмеген көлік қызметтері үшін 2,2 млрд теңге аударылған.
«Аталған бұзушылықтар бойынша 10.07.2024 ж. Қылмыстық кодекстің 189-бабының 4-бөлігімен (ерекше ірі мөлшердегі жымқыру) сотқа дейінгі тергеу басталды», - делінген хабарламада.
Бұдан басқа, прокуратура «ҚазМұнайГаз» ҰК» АҚ (ҚМГ) еншілес ұйымында 11 млн теңге жымқыру фактісі бойынша сотқа дейінгі тергеу бастады.
«ҚҚ 189-бабы бойынша бұрын басталған сотқа дейінгі тергеулер аясында қаражат жымқыру фактілері бойынша «Ойл Транспорт Корпорейшн» ЖШС өндірістік-техникалық бөлімінің бастығы, мердігер ұйымдардың 2 өкілі ұсталды», - делінген хабарламада.
Ведомство тексеру басталғаннан бері барлығы 19 сотқа дейінгі тергеу бастағаны, олар қазіргі уақытта Маңғыстау облысы экономикалық тергеу департаментінің іс жүргізуінде екені атап өтіледі.
Олардың тергеуі аясында бюджет қаражатын жымқыру және ысырап ету фактілері бойынша 8 адам, оның ішінде ҚМГ еншілес компанияларының 4 басшысы ұсталды.