Қандай компаниялар су тасқынына қарсы іс-шаралар бойынша тендерлерді ұтып алғаны және жекелеген өңірлерде бұған қанша қаражат бөлінгені белгілі болды.
Telegram-арнасы «Shishkin_like» хабарлағандай, 26 наурызда ТЖ режимі жарияланған Оралда суды сорумен «Жайық Таза Қала» ЖШС айналысады. Компания 2023-2024 жылдарға арналған көше-жол желісін күтіп ұстау және қаланы санитарлық тазалау тендерін ұтып алды. Келісімшарттың жоспарланған сомасы 5,9 млрд теңге, нақты сомасы – 1,8 млрд теңге құрады. ЖШС құрылтайшысы – Орал қалалық мәслихатының бұрынғы депутаты, қазір БҚО мәслихатында отырған Тұрарбек Тлемісов. 2015 жылдан бастап оның компаниясы бюджетке 3,2 млрд теңге төлегені, оның ішінде 2023 жылы 552 млн теңге төленгені хабарланады.
Оған қоса, БҚО ТЖ департаменті мұздың кептелуін болдырмау үшін өзендердегі жарылыс жұмыстарына қостанайлық «ЭРА БВР» компаниясымен келісімшарт жасасты. Бұған 35 млн теңге бөлінді. Компанияның құрылтайшысы – Жұмабай Құлпатшаев. 2021 жылдан бастап «ЭРА БВР» 104 млн теңге салық төледі, оның ішінде 2023 жылы 67 млн теңге.
Сонымен қатар, Батыс Қазақстан облыстық ТЖ департаменті су тасқыны мен өрттерді ғарыштық мониторингілеу қызметіне 5,8 млн теңге жұмсады. Мониторингті «Қазақстан Ғарыш Сапары» ұлттық компаниясы жүргізеді.
28 наурызда ТЖ режимі жарияланған Қостанай облысының Арқалық қаласында биыл қарды шығарумен «KomJolStroy» компаниясы және «Тазарту – Арқалық» ЖШС айналысады. Соңғысының құрылтайшысы – Қостанай облыстық мәслихатының бұрынғы депутаты Абай Мұқанов. Ол компанияны «Алюминстрой» ЖШС арқылы иеленеді. «Тазарту – Арқалықтың» абаттандыру, тазалау, қоқыс шығару бойынша 54 млн теңгеге 50-ден астам келісімшарты бар. Оның ішінде биыл қар шығаруға 8,8 млн теңге.
Екінші компания «KomJolStroy» жыл соңына дейін екі келісімшартқа ие – 27 млн теңге және 18 млн теңгеге. Құрылтайшысы болып Жанна Бейсекеева тіркелген. 2017 жылдан бері оның компаниясы 128 млн теңге салық төледі, оның ішінде 2023 жылы 29,9 млн теңге. Сонымен қатар, наурыз айының басында Арқалық әкімдігі қар шығару бойынша ТЖ жоюға «Аман» ЖК – 4,8 млн теңгеге және «Баракат» ЖК – 2,6 млн теңгеге келісімшарт жасасты.
Семейде көшелерді қардан тазалауға әкімдік «Семей тазалық» ЖШС – 1,2 млрд теңгеге келісімшарт жасасты. Компанияның құрылтайшылары – Нұржан Даниялов және Бекжан Қапышев. Компанияның 2015 жылдан бергі салығы 507 млн теңге құрады, оның ішінде 2023 жылы 156 млн төленді.
Су тасқынына байланысты ТЖ режимі жарияланған Ақтөбеде су стихиясымен күресті бірнеше жеткізуші жүргізеді. Алматы ауданында су тасқынына қарсы іс-шараларға 107 млн теңге, Астана ауданында – 71 млн теңге бөлінді. Тендерлердің жеңімпазы – құрылтайшысы Гаухар Шінбаева болып табылатын ZNS Group компаниясы. Салық есептілігі 2016 жылдан бері 175 млн теңге екенін көрсетті, оның ішінде 2023 жылы 72 млн теңге.
Сонымен қатар, журналистер ағынды және атмосфералық суларды соруға 25 млн теңге сомасына екі тендерді анықтады. Бұл жұмысты MN Construction компаниясы жүргізеді. Оның құрылтайшысы – Мирамбек Жұмағалиев. 2015 жылдан бері компания 29 млн теңге салық төледі, оның ішінде 2023 жылы 873 мың теңге.