Ақтөбе облысы Қромтау қаласының әкімі Сағындық Шабықбаев пара алуда кінәлі деп танылып, 11,3 млн теңге айыппұл салынды. Аудандық сот оны мемлекеттік қызметте лауазымдарды атқару құқығынан өмір бойына айырды.
"Қазинформ" ХАА мәліметінше, әкімнен басқа Ақтөбе тұрғыны Нұрбек Казбекке де айып тағылды. Шабықбаев – "Пара алу" бабы бойынша, Казбек — "Пара алу" және "Қорқытып алу" баптары бойынша.
Хабарланғандай, қазан айында Нұрбек Казбек Қромтау әкімінің мүддесінде әрекет етіп, абаттандыру және жөндеу жұмыстарын жүргізген мердігерден Сағындық Шабықбаев үшін 400 мың теңге және өзі үшін тағы 1,1 млн теңге беруді талап еткен.
Сот материалдарынан Казбектің белгіленген мерзімде ақшаны беруден бас тартқан жағдайда күш қолданумен қорқытқаны көрінеді. Осы әрекеттердің нәтижесінде жәбірленуші 700 мың теңге көлемінде шығын келтірген.
Сот талқылауы барысында жәбірленуші Нұрбек Казбекті кешірген. Осыған байланысты сот ҚК 194-бабының 1-бөлігі ("Қорқытып алу") бойынша іс жүргізуді тоқтатты, және сотталушы жауапкершілікке тек пара алу эпизоды бойынша тартылды. Екі сотталушы да кінәсін толық мойындады.
"Мен істеген ісіме толық өкінемін. Маған тағылған айыппен толық келісемін және кінәмді мойындаймын. Айыппұл түріндегі жаза тағайындауды сұраймын", — деді сотта Сағындық Шабықбаев.
Сот істі қысқартылған тәртіппен қарады. Тараптардың пікірталасынан кейін үкім сол күні жарияланды.
Нәтижесінде Сағындық Шабықбаев кінәлі деп танылып, мемлекеттік қызметте, сондай-ақ сот органдары мен жергілікті өзін-өзі басқару органдарында лауазымдарды атқару құқығынан өмір бойына айырылды. Сот оған алынған параның 30 еселенген мөлшерінде — 12 млн теңге айыппұл түрінде жаза тағайындады. Қамауда өткізген уақытты ескере отырып, айыппұлдың түпкілікті мөлшері 11,3 млн теңгені құрады.
Нұрбек Казбек мүлікті тәркілемей, мемлекеттік және квазимемлекеттік секторда жұмыс істеу құқығынан өмір бойына айырылды. Тағайындалған айыппұл да 12 млн теңгені құрады. Қамауда өткізген уақытты ескере отырып, айыппұлдың түпкілікті мөлшері 11,3 млн теңге болды. Екі сотталған да сот залында күзеттен босатылды.
Еске сала кетейік, соңғы екі жылда қаланы басқарған 40 жастағы шенеуніктің пара алуға күдікті екені қараша айында хабарланған болатын. Ұсталғаннан кейін Ақтөбе облыстық соты оны екі ай мерзімге қамауға алуға санкция берген.
Кейінірек атап өтілгендей, құқық қорғаушылар Шабықбаевқа қатысты тергеуді аяқтап, іс материалдарын Қромтау аудандық сотына жіберген.