Астананың қылмыстық істер жөніндегі мамандандырылған ауданаралық сотында мемлекеттік қорғаныс тапсырысы саласындағы ақша қаражатын жымқыру туралы резонанстық іс бойынша үкім шығарылды. Бұл туралы Қаржылық мониторинг агенттігінің баспасөз қызметі хабарлады.
2023 жылғы қарашада белгілі болғандай, «Қазарнаулыэкспорт (Казспецэкспорт)» РМК бас директоры Арман Рамазанов, сол компанияның импорт департаментінің директоры Азат Құдабаев және бірнеше әскери тауар жеткізушілері ұсталды.
Олар әскери мақсаттағы өнімдерді сатып алуға бөлінген бюджет қаражатын жымқыруда және сыбайлас жемқорлықта айыпталды. Мемлекетке келтірілген залал 1,6 млрд теңгеден асты.
Белгілі болғандай, сот Рамазановты кінәлі деп танып, оған 11 жыл бас бостандығынан айыру жазасын тағайындады. Құдабаев 10 жылға бас бостандығынан айырылды. Қалған айыпталушылар әртүрлі мерзімге бас бостандығынан айырылды.
Сонымен қатар, мемлекет пайдасына 1,6 млрд теңге өндіріліп, сотталғандардың 607 млн теңге тұратын мүлкі тәркіленді.
Еске сала кетейік, қаңтар айында Астанада «Казспецэкспорт» РМК директоры міндетін атқарушы Аршат Аяганов сотталды. Ол броньды техниканы жеткізу кезінде лауазымдық өкілеттіктерін теріс пайдаланғаны үшін кінәлі деп танылды. Мемлекетке келтірілген залал 2,8 млрд теңгені құрады.
Айта кетейік, бұған дейін ФБРК редакциясы «Казспецэкспорт» мамандандырылған жабдықтар мен техника бойынша сауда-саттық өткізгенін жазған болатын. Атап айтқанда, сатуға броньжилеттер, қопарғыш жиынтықтары, сондай-ақ МиГ ұшақтары қойылды.