Бәсекелестікті қорғау және дамыту агенттігі (БҚДА) интернет қызметтері нарығында бәсекелестікті бұзу фактілерін анықтады.
Ведомствоның баспасөз қызметінің мәліметінше, қазіргі уақытта сымды интернет нарығында үстемдік жағдайды «Қазақтелеком» АҚ және «Кар-Тел» ЖШС (Beeline) иеленеді.
«Агенттік талдау барысында үшінші тарап байланыс операторларының көппәтерлі тұрғын үйлерге қызмет көрсету кезінде кіруін қиындататын, сондай-ақ кабельдік канализация желілеріне қосылудың техникалық шарттары туралы ақпарат алуды қиындататын кедергілерді анықтады», - делінген хабарламада.
Аталған кедергілерді жою тұтынушыларға интернет қызметінің операторын өз бетінше таңдауға мүмкіндік беретіні атап өтілді. Бұзушылықтарды жою бойынша тиісті ұсынымдар уәкілетті мемлекеттік органдардың мекенжайына жіберілді.
Сонымен қатар, талдау нәтижелері бойынша «Қазақтелеком» АҚ-ның әрекеттерінен тауарға монополиялық жоғары баға белгілеу белгілері анықталды. Осыған байланысты БҚДА бәсекелестікті қорғау саласындағы заңнаманы бұзу бойынша тергеуді бастады.
Еске сала кетейік, былтырғы мамырда БҚДА төрағасы Марат Омаров айтқандай, ведомство ҚР үш ұялы байланыс операторын (Kcell, Tele2/Altel, Beeline) тарифтерді көтеру бойынша сөз байласуда күдіктенді. Сонда ол оларға қатысты тексеру аяқталып, қорытындылар шығарылып, белгілі бір сот процестері басталғанын атап өтті.
Кейінірек БҚДА компанияның тарифтердің, оның ішінде үй интернетінің қымбаттауы туралы мәлімдемесінен кейін «Қазақтелеком» АҚ мекенжайына ескерту жіберді. Қазанда БҚДА соттар аяқталғанға дейін байланыс операторларына қатысты тергеуді тоқтатты.
Ағымдағы жылдың қаңтарында БҚДА 2025 жылғы ақпаннан бастап сымды интернет тарифтерінің көтерілуіне байланысты Beeline («КаР-Тел» ЖШС) ұялы операторына қатысты тексеруді бастады. Ведомство баға өсімінің негізділігін талдау үшін оператордан құжаттаманы сұратты.