Бас прокуратураның Активтерді қайтару жөніндегі комитетінің жұмысы аясында мемлекетке қайтарылған активтер көлемі екі жылда 1,3 трлн теңгеден асты. Хабарланғандай, бір триллионнан астам теңге бюджет кірісіне түсті, оның ішінде 928,6 млрд теңге — қолма-қол ақша түрінде және 107,7 млрд теңге — мүлік түрінде.
«Казинформ» ХАА мәліметінше, ведомство «Заңсыз алынған активтерді мемлекетке қайтару туралы» Заңның субъектілері жалпы құны 5,2 трлн теңге болатын инвестициялық және әлеуметтік жобаларды іске асырып жатқанын атап өтті.
Қайтарылған қаражат есебінен бүкіл ел бойынша, негізінен шалғай елді мекендерде 434 нысанның құрылысы қаржыландырылғаны атап өтілді. Білім беру, денсаулық сақтау, спорт, сондай-ақ коммуналдық және өзге де инфрақұрылым нысандары туралы сөз болып отыр.
Атап айтқанда, 227 сумен жабдықтау жүйелері нысанының, 183 медициналық мекеменің, 11 білім беру саласындағы нысанның, 5 спорт нысанының және 8 инфрақұрылымдық нысанның құрылысы мен реконструкциясы басталды.
Хабарланғандай, қысқа мерзімде 151 нысанның, оның ішінде 99 денсаулық сақтау нысанының, 48 сумен жабдықтау нысанының, екі білім беру нысаны мен екі спорт нысанының құрылысы аяқталды.
Бас прокуратурада бөлек атап өткендей, қазіргі уақытта Активтерді қайтару жөніндегі комитеттің атауын Инвесторлардың құқықтарын қорғау жөніндегі комитет деп өзгерту бойынша жұмыс жүргізілуде. Президент Қасым-Жомарт Тоқаев биылғы жылдың күзінде Қазақстан халқына Жолдауында тиісті ұсынысты айтқан болатын.
Бас прокуратура комитеттің атауын өзгерту, сондай-ақ оның ережесі мен функционалдық өкілеттіктерін бекіту бойынша құжаттар дайындалып жатқанын нақтылады. Жұмыстың жаңа форматы кәсіпкерлер мен инвесторлардың құқықтарын қорғауға бағытталады деп күтілуде.
Қаржы министрлігінде хабарлағандай, 19 желтоқсандағы жағдай бойынша Арнайы мемлекеттік қордың қаражат көлемі 2,8 млрд теңгені құрады. Түсімдердің жалпы көлемі 498,9 млрд теңгеге жетті, шығыстар — 496,1 млрд теңге.
Сондай-ақ, жақында ҚР Сенаты «Конституциялық соттың шешімдерін орындау және заңсыз алынған активтерді мемлекетке қайтару мәселелері бойынша кейбір заңнамалық актілерге өзгерістер мен толықтырулар енгізу туралы» Заңды екі оқылымда мақұлдағаны белгілі болды. Түзетулер азаматтардың құқықтары мен заңды мүдделерін қорғауды күшейтуге бағытталған. Атап айтқанда:
- активтерді қайтару нәтижелері және оларды пайдалану туралы ақпаратты жариялау міндеті енгізілді;
- экономика мен әлеуметтік салаға қаражат салуды көздейтін келісімдер егжей-тегжейлі реттелді;
- ерікті тәртіппен қайтарылған немесе келісімдер бойынша мемлекетке берілген активтер заңсыз алынған деп танылмайтыны туралы ереже бекітілді.