Қазақстанда электрондық цифрлық қолтаңбаны (ЭЦҚ) басқа адамның пайдалануы үшін әкімшілік құқық бұзушылықтың жаңа түрі күшіне енеді.
Цифрлық даму, инновациялар және аэроғарыш өнеркәсібі министрлігінің баспасөз қызметінің мәліметінше, бұрын әкімшілік жауапкершілік тек ЭЦҚ кілтін үшінші тұлғаларға заңсыз беру және тіркеу куәлігінің иесінің оны қорғау шараларын қабылдамауы үшін ғана көзделген болатын.
«Түзетулер күшіне енгеннен кейін ЭЦҚ берген тұлға да, оны пайдаланған тұлға да жауапкершілікке тартылатын болады», - делінген хабарламада.
Министрлікте түсіндіргендей, енді дербес деректерді және ЭЦҚ-ны қорғау салаларындағы әкімшілік құқық бұзушылықтар үшін жауапкершілікке тарту мерзімі жасалған күннен бастап екі айдан бір жылға дейін ұлғайтылды.
Бұдан басқа, дербес деректер және оларды қорғау туралы заңды бұзу, яғни дербес деректерді заңсыз жинау, өңдеу және оларды қорғау шараларын сақтамау үшін әкімшілік айыппұлдардың мөлшері үш есеге өсті.
Бұрын айыппұлдар құқық бұзушылықтың құрамына байланысты 10 АЕК-тен (39,3 мың теңге) 1000 АЕК-ке (3,9 млн теңге) дейін ауытқыған еді. Енді олар 30 АЕК-тен (117,9 мың теңге) 2000 АЕК-ке (7,8 млн теңге) дейін құрайтын болады.
Бұл шаралар дербес деректерді қорғауды күшейтуге, ЭЦҚ-ны пайдалану қауіпсіздігін қамтамасыз етуге және ақпараттандыру саласындағы бұзушылықтар үшін жауапкершілікті арттыруға бағытталғаны атап өтілді.