(19 қаңтар 2026 | Дереккөз: «Ашық НҚА» порталы)
Әскерде мерзімді қызметін өтеп жүрген қазақстандықтар банктер мен микроқаржы ұйымдарынан несие алу мүмкіндігінен айырылуы мүмкін. Қазақстан Республикасы Қаржы нарығын реттеу және дамыту агенттігінің (ҚРДА) тиісті қаулы жобасы «Ашық НҚА» порталында жарияланды.
МӘЛІМЕТТЕРМЕН АЛМАСУ
Жоба қорғаныс министрлігі мен несиелік бюролар арасында мерзімді әскери қызметке шақырылған азаматтар туралы мәліметтермен алмасу тәртібін айқындайды. Бұл мәліметтер қолданыстағы несиелер бойынша жеңілдік мерзімін ұсыну үшін пайдаланылады және қызмет өткеру кезеңінде және босатылғаннан кейін несие тарихында көрсетіледі.
НЕСИЕГЕ ТЫЙЫМ САЛУ
Құжат банктер мен микроқаржы ұйымдарын несие өтінімін қарау кезінде өтініш берушінің мәртебесін несиелік есепте тексеруге міндеттейді. Егер онда азаматтың мерзімді әскери қызметін өтеп жатқаны көрсетілсе, несие беруден бас тартылады.
ТАЛҚЫЛАУ
ҚРДА қаулысының жобасы «Ашық НҚА» порталында осы жылдың 3 ақпанына дейін талқылауға қолжетімді.