Қаржылық мониторинг агенттігі (ҚМА) «Таразэнергоцентр» АҚ акцияларының 100%-ын мемлекет меншігіне қайтарды. Бұл шешімнің негізі ірі мемлекеттік қаражатты ұрлау ісі бойынша тергеудің аяқталуы болды, деп хабарлайды ведомствоның баспасөз қызметі.
Тергеу барысында қылмыскерлердің заңсыз монополиялық жоғары табыс алу мақсатында қылмыстық топ ұйымдастырғаны анықталды. Олар бақылауындағы компания арқылы 4,3 млрд теңге ұрлап, кейін жалған кәсіпорындар желісін пайдаланып қаражатты заңдастырған.
Сот талқылауының қорытындысы бойынша схеманың сегіз қатысушысы кінәлі деп танылып, қатысу дәрежесіне қарай 3 жылдан 13 жылға дейін нақты бас бостандығынан айыру жазасына кесілді.
Естеріңізге сала кетейік, биылғы жылдың маусым айында энергетика министрі Алмасадам Сәтқалиев бірнеше өңірдегі ЖЭО жөндеу жұмыстарының кешігуі туралы хабарлаған болатын. Ол проблемалы объектілер қатарында негізгі жабдықтарды жөндеу мерзімдерінің сақталмауына байланысты жылу маусымына дайындалуға үлгермеген «Таразэнергоцентр» АҚ ЖЭО-4 атады.