(26 ақпан 2026 | Дереккөз: ХАА «Қазинформ»)
Түркістан облысында электрондық саудаға кәсіби «Тұран» футбол клубы қойылды. Бастапқы баға оның баланстық құнынан екі есеге жуық асады, бұл ретте болашақ иесі 10 жыл бойы клубтың бейінін сақтап, команданың Қазақстан Премьер-лигасына қатысуын қамтамасыз етуге міндетті.
КЛУБ ЭЛЕКТРОНДЫҚ САУДАҒА ҚОЙЫЛДЫ
Түркістан облысының қаржы және мемлекеттік активтер басқармасы хабарлағандай, сату туралы ақпарат e-Qazyna порталында орналастырылған.
ХАА «Қазинформ» мәліметінше, объектінің бастапқы бағасы 1 054 000 теңгені, баланстық құны — 535 мың теңгені құрайды. Саудаға қатысу үшін 158 мың теңге көлемінде кепілдік жарна енгізу қажет.
Электрондық сауда 2026 жылғы 3 наурызға белгіленген және Астана уақытымен 09:55-те басталады.
«Тұран» кәсіби футбол клубы» мемлекеттік мекемесінде 14 қызметкер жұмыс істейді.
БОЛАШАҚ ИЕСІНЕ ҚАНДАЙ ТАЛАПТАР ҚОЙЫЛАДЫ
Жекешелендіру шарттарына сәйкес, сатып алушы 10 жыл ішінде бірқатар талаптарды орындауға міндетті. Олардың ішінде:
- футбол клубының бейінін сақтау;
- штат санын сақтау;
- инвестициялық салымдарды қамтамасыз ету;
- жастар академиясын құру және футболды дамыту;
- әйелдер футбол командасын дайындау;
- соңғы бес жылдағы жергілікті ірі стадиондармен келісімшарттарды қоса алғанда, материалдық-техникалық базаның болуын қамтамасыз ету;
- 2027 жылдан бастап тұрақты негізде Қазақстан Премьер-лигасына қатысу;
спорт саласында кемінде 5 жыл еңбек өтілі болуы; - клубты сенімгерлік басқаруға бермеу және одан айыруға жол бермеу.
САТЫП АЛУҒА КІМ ҚЫЗЫҒУШЫЛЫҚ ТАНЫТУДА
Өңірлік билік бұған дейін клубты жекешелендіру және жеке инвестор іздеу процесінің басталғанын растаған болатын.
Ведомство мәліметінше, саудаға қатысуға әлеуетті үміткерлер қатарында FlyArystan компаниясы да бар.
Еске сала кетейік, бұған дейін премьер-министр Олжас Бектенов футбол клубтары мен олардың инфрақұрылымын жекешелендіру процесі белсенді кезеңде екенін хабарлаған болатын.
Қазан айының соңында белгілі болғандай, «Қайсар» ФК кәсіпкер, «TAU Group LTD», «Алем строй» және бетон зауытының иесі Исламғали Қозбақов сатып алды.
Қараша айында Петропавлда «Қызыл-Жар» ФК спорттық брендін, инфрақұрылымы мен активтерін «Орталық-Азия Электр Энергетика Корпорациясы» АҚ тең иелерінің бірі Сергей Канға беру туралы келісімге қол қойылды.
Осыдан кейін 2025 жылғы 13 қарашада Михаил Ломтадзе «Жеңіс» ФК-нің иесі атанды және клуб базасында Астанада әлемдік деңгейдегі тегін балалар футбол академиясын құру туралы мәлімдеді.
Кейінірек «Qazaq Stroy» компаниясының иесі Нұрлан Артықбаев «Ақтөбе» футбол клубының инвесторы атанғаны хабарланды.
Содан кейін кәсіпкер Тимур Турловтың Freedom Holding Corp. тобындағы компаниясы аукционда Қарағандының «Шахтер» футбол клубын сатып алды.
2025 жылдың соңында «Астана» ФК жекешелендіруге дайындала бастады — жеке инвестор табылды, алайда барлық рәсімдер аяқталғанға дейін оның есімі жарияланбайды.