Үкімет басшысы Олжас Бектенов бұрынғы мәслихат депутаты Габит Сатмағамбетов басқаратын G-Park құрылыс компаниясы салған проблемалық нысандарға алаңдаушылық білдірді.
БАҚ хабарлағандай, премьер-министр көптеген құрылыс нысандарының болашағы құжаттамадағы проблемаларға байланысты алаңдаушылық тудырады деп санайды.
«Астанада G-Park компаниясы рұқсат құжаттарынсыз жеті тұрғын үй салып жатыр. Ал оған 3,5 мыңға жуық отбасы қаражатын салған. Сонымен қатар, Астанада «Араби-2 — Гранитный-2» тұрғын үй кешені 10 жылдан астам уақыт бұрын проблемалық деп танылған. 200-ге жуық отбасы пәтер ала алмай отыр», - деп атап өтті үкімет басшысы.
Өнеркәсіп министрлігінің мәліметінше, жалпы елде заңсыз құрылыстың 340-тан астам фактісі тіркелген. Бектеновтің пікірінше, бұл негізінен әкімдіктердің жеткіліксіз жұмысының нәтижесі.
Ұзаққа созылған құрылыс мәселесінің әлі де басылмауына байланысты премьер-министр Өнеркәсіп министрлігі мен әкімдіктерге маусым айының басына дейін құрылыс салушыларды құрылыстың заңдылығы мен қажетті құжаттардың болуы тұрғысынан тексеруді тапсырды. Сондай-ақ ол тұрғын үйлерді пайдалануға беруді қатаң бақылауға алуды бұйырды.
Өз кезегінде Өнеркәсіп және құрылыс министрі Қанат Шарлапаев мәлімдегендей, өз ведомствосы жүргізген талдау қорытындысы бойынша республикада үлестік құрылыстың 581 салынып жатқан нысаны анықталды.
Сонымен қатар, 421 нысан үлескерлердің ақшасын тартуға рұқсатсыз салынып жатқаны белгілі болды, оның ішінде: Маңғыстау облысында 125, Ақтөбе облысында 76, Алматыда 45, Атырау облысында 38, Ақмола облысында 36, Астанада 26, Жамбыл облысында 19, Шымкентте 14, Қарағанды облысында 13, Алматы облысында 10, ШҚО-да 7, СҚО-да 7, Абай облысында 3, Жетісу облысында 1 және Ұлытау облысында тағы 1.