Екібастұз прокуратурасы өңірдегі ірі кәсіпорындардың салықтарды толық және уақтылы төлемеу фактілерін анықтады.
Павлодар облысы прокуратурасының баспасөз қызметінің мәліметінше, жабдықты жөндеу кезінде «Б. Нұржанов атындағы Екібастұз ГРЭС-1» ЖШС табыс алумен байланысты емес тауарлар, жұмыстар мен қызметтер бойынша сомаларды негізсіз шегерімге шығарған.
«Нәтижесінде жалпы сомасы 421 млн теңге салық төленбеген», - делінген хабарламада.
Сонымен қатар, «Қазақстан вагон жасау компаниясы» ЖШС қызметінде өнімді өткізу бойынша айналымның төмендеуі анықталды, бұл да бюджетке түсімдерге әсер етті. Төлемеу сомасы 550 млн теңгені құрады.
«Қадағалау актісі бойынша фискалдық органдар камералдық бақылау жүргізді, сондай-ақ салық төлеушілердің қатысуымен әкімшілік тыңдаулар ұйымдастырылды», - делінген хабарламада.
Нәтижесінде анықталған барлық бұзушылықтар жойылды, кәсіпорындар салық міндеттемелерін ерікті түрде орындады, ал жетіспейтін сомалар мемлекеттік бюджетке толығымен аударылды.
Естеріңізге сала кетейік, бұған дейін Павлодар облысы мемлекеттік кірістер департаменті «Богатырь Комир» ЖШС белгіленген 15% орнына корпоративтік табыс салығының (КТС) 5% мөлшеріндегі төмендетілген мөлшерлемесін заңсыз қолданғанын анықтады.
Аудит қорытындысы бойынша кәсіпорынға 777 млн теңге сомасына КТС қосымша есептеу туралы хабарлама жіберілді.