Қаржылық мониторинг агенттігі (ҚМА) Тараз қалалық әкімдігінің қаржы бөлімінің лауазымды тұлғаларына қатысты сотқа дейінгі тергеуді бастады.
Ведомствоның баспасөз қызметінің мәліметінше, әкімдік қызметкерлері тауарлық-материалдық құндылықтардың есебінің жоқтығын пайдаланып, ресми құжаттарды қолдан жасап, сот шешімдері бойынша тәркіленген мүлікті шығарып жіберген деген күдікке ілінген.
Заңсыз әрекеттерден келтірілген залал сомасы 100 млн теңгеден асты.
«Қазіргі уақытта тергеу-жедел іс-шаралар, тиісті сараптамалар жүргізілуде, олардың нәтижелері бойынша істер бойынша процессуалдық шешімдер қабылданатын болады», - делінген хабарламада.
Еске сала кетейік, бұған дейін белгілі болғандай, Тараз қалалық әкімдігінің ТКШ, жолаушылар көлігі және автомобиль жолдары бөлімі мердігерге төрт әзірленбеген сметалық құжаттама үшін 75 млн теңгені негізсіз аударған.