Түркістан облысында бюджет қаражатын жымқырғаны үшін Мақтаарал мүгедек балаларды оңалту орталығының директоры Нұржан Сүлейменов және бас бухгалтері Мәдина Наурызбаева сотталды.
Ratel.kz мәліметінше, мекемедегі алаяқтық кемінде бес жыл бойы жүргізілген. 2019 жылы басшылар қызметкерлерге олардың штаттық жалақысынан ондаған есе артық жалақы есептеп, артығын иемденіп отырған. Сонда келтірілген залал 7,2 млн теңге, ал 2020 жылы — 14,7 млн теңге құраған. 2021 жылдан 2024 жылға дейін айыпталушылар 10 млн теңге қаражатты иемденген.
Сонымен қатар, орталық директоры мен бухгалтері жалған жалақысы бар екі «өлі жанды» ресімдеп, сол арқылы төрт жыл ішінде 45 млн теңгеден астам қаражатты жымқырған.
Наурызбаева кінәсін мойындап, директордың нұсқауы бойынша әрекет еткенін, қаражаттың негізгі бөлігі соған тиесілі болғанын мәлімдеген.
Ал Сүлейменов өз кезегінде кінәсін жоққа шығарып, басшы ретінде бухгалтерге шамадан тыс сенім артып, мекеменің қаржылық ағындарына тиісті бақылауды жүзеге асырмағанын айтқан.
Нәтижесінде сот Нұржан Сүлейменовті кінәлі деп танып, оған 8 жыл бас бостандығынан айыру және өмір бойы мемлекеттік лауазымдарды атқару құқығынан айыру жазасын тағайындаған. Мәдина Наурызбаева 7 жыл бас бостандығынан айыруға және 8 жылға бухгалтерлік қызметпен айналысуға тыйым салуға сотталды.
Олар сонымен бірге бір ай ішінде ортақ тәртіппен келтірілген 84,3 млн теңге көлеміндегі залалды өтеп, 2,5 млн теңге мөлшеріндегі мемлекеттік баж салығын төлеуге міндеттелді.
Еске салайық, сәуір айында белгілі болғандай, «Павлодар облысының жұмыспен қамтуды үйлестіру және әлеуметтік бағдарламалар басқармасы» ММ «Арт-Class» ЖШС және «Аюм и Д» мүгедектер қоғамдық бірлестігімен ноутбуктер мен ұялы телефондар жеткізуге шарт жасасқан. Сатып алу сомасы 476 млн теңгеден астамды құраған.
Алайда жеткізуші электронды техниканың арзан аналогтарын сатып алып, олар мәлімделген техникалық сипаттамаларға сәйкес келмеген. Осылайша ол 133 млн теңгеге жуық залал келтірген. Сот жұмыспен қамту басқармасы басшысының орынбасарын кінәлі деп танып, оған 9 жыл бас бостандығынан айыру жазасын тағайындаған. Жеткізуші 7,5 жылға бас бостандығынан айырылды.
Мамыр айында хабарланғандай, Павлодар қалалық әкімдігі мен Павлодар аудандық әкімі аппаратының қызметкерлері бюджеттен 89 млн теңгеден астам қаражатты жымқырған. 2022 жылғы тамыздан 2023 жылғы қыркүйекке дейін олар мүгедектердің жеке көмекшілерінің жұмысы үшін заңсыз ақы алып отырған. Нәтижесінде сот сотталғандарға 3,5 жылдан 5,5 жылға дейін бас бостандығын шектеу түріндегі жаза тағайындаған.
Қараша айында ШҚО Сыбайлас жемқорлыққа қарсы қызметі Қазақстан саңыраулар қоғамының «Шығыс» корпоративтік қорының басшысын алаяқтықта әшкерелеген. Ол 115 млн теңге бюджет қаражатын иемденді деген күдікке ілінген.
Желтоқсан айының басында Қостанайда белгілі бір тұрғылықты жері жоқ адамдарға арналған әлеуметтік бейімдеу орталығының басшысы 11,2 млн теңге жымқырғаны үшін кінәлі деп танылған.